Kommunen skal behandle denne saka etter plan- bygningslova (pbl), i tillegg skal NVE behandle saka etter energilova.
Kommunen skal behandle vindkraftanlegg som områdeplan og NVE skal behandle vindkraftanlegg etter energilova (konsesjonsprosessen).
Altså to parallell saksbehandlingsprosessar.
Kommunane har med dette ein såkalla «vetorett», det vil sei at NVE ikkje kan gje konsesjon utan at kommunen har vedteke ein områdeplan.
Det er det overordna.
Vidare kan du lesa meir om korleis behandlinga av ein områdeplan i kommunen går føre seg.
Behandling av områdeplan - slik er prosessen
Prosessen kan litt forenkla delast i tre fasar:
Fase 1: Planoppstart og planprogram (i vindkraftsaker kalla plan- og utgriingsprogram (PU)
Fase 2: Utgreiingar og utarbeiding av planforslag
Fase 3: Planbehandling og høyring av planen
Har begynt på fase 1
Saksbehandlinga av Slettene vindkraftanlegg har knappast begynt på fase 1.
Til nå har kommunen mottatt eit planinitiativ og gjennomført eit oppstartsmøte. Kommunen vedtek ikkje eit planinitiativ i oppstartsmøte, men kommunen har høve til stoppe eit planinitiativ i oppstartsmøte.
Dette kan høyrast ut som to forskjellige måtar å sei det same på, men det er det ikkje.
Når kommunen vedtek noko så går me god for innhaldet og det blir fatta eit formelt vedtak, det gjer ikkje kommunen med eit planinitiativ.
Me har vurdert at planinitiativet er i samsvar med rammene for planoppstarten og administrasjonen stoppar derfor ikkje planprosessen. Med det kan Eviny gå i gong med å utgreia planane sine vidare innanfor rammene til ein planprosess.
Det er mogleg å ha ein politisk prinsippavklaring av planoppstart, men kommunestyret i Vindafjord kommune ynskjer å ta stilling til vindkraftsaker sak for sak etter pbl. prosessen, basert på mellom anna eit verbal vedtak om dette i økonomiplanen for 2026.
Planinitiativ i 2024
Eviny leverte eit tilsvarande planinitiativ for Slettene vindkraftverk i fjor. Dette var før kommunestyret hadde tatt stilling til behandling av vinkraftsaker, og då valte me i kommunen å legge fram ei politisk prinsippavklaring til behandling i kommunestyre før oppstartsmøtet. Denne saka blei aldri behandla, då Eviny trakk initiativet sitt.
Då prisnippavklaringa blei lagt fram for politisk behandling i desember 2024 fekk me i kommunen fleire tilbakemeldingar om at saka var for dårleg opplyst. Det kan det godt argumenterast for, det ligg ikkje føre mykje konkret informasjon om konsekvensar på dette tidspunktet i prosessen.
Den formelle utgreiingsprosessen har ikkje starta. I første fase skal ein altså ta stilling til føresetnadar og om planarbeidet kan starte. I denne fasen er det er ikkje nok informasjon til å ta stilling til sjølve utbygginga.
Om ikkje kommunestyret vil ha saka til behandling før, så blir første politiske behandling i Vindafjord kommune behandling av eit plan- og utgreiingsprogram (PU). PU utgjer sist del av fase 1.
På høyring
Før den tid skal PU på høyring. PU er planen for korleis planen skal lagast. Det handlar mellom anna om kva som skal utgreiast og korleis innbyggar, nabokommunar, interesseorganisasjonar og andre skal medverke i planarbeidet.
Kommunen har fått signal frå Eviny at dei sannsynlegvis sender melding med PU til kommune og NVE rundt påsketider i år. Då vil den sannsynlegvis blir lagt på høyring i løpet av våren. Det vil vere den første formelle høyringsprosessen i saka.
Mest sannsynleg vil dette kunne gje ei eventuelt behandling av PU i formannskapet i løpet av hausten. Då kan formannskapet velje å fastsetje PU, og Eviny kan begynne å lage planen, eller formannskapet kan velgje å ikkje fastsett PU og då stoppar planane ved denne behandlinga. Denne behandlinga vil uansett avslutte fase 1 av prosessen.
Fase 2
I fase 2 blir planforslaget laga, utgreiingar blir gjort og medverknad gjennomført, etter føringar som er vedteke i PU. Fase 2 blir avslutta ved at Eviny eventuelt sender ein fullstending plan og konsesjonssøknad til høvevis kommune og NVE.
Fase 3
I fase 3 skal kommunen ta stilling til innhaldet i planen, først skal kommunen vurdere om planforslaget kan sendast på høyring (føregangsbehandling), deretter skal plan og konsesjonssøknaden høyrast og medverknad skal gjennomførast.
Til slutt, om alle eventuelle motsegner blir løyste, kan saka leggast fram til endeleg behandling i kommunestyret. Det er først då det skal tas stilling til om dette er noko som Vindafjord kommune faktisk ynskjer.
Ein lang prosess
I denne prosessen er det altså minst to opne høyringar og tre politiske behandlingar hjå dei folkevalde i kommunen. I alle desse behandlingane kan prosessen stoppast.
Saka står der at kommunen har motteke eit planinitiativ og avklart føresetnadane for det vidare planarbeidet gjennom eit oppstartsmøte.
Det er avgjerande at saka blir godt opplyst og skikkeleg saksbehandla for alle involvert, uavhengig av standpunkt til vindkraft.
Som me har skildra her er dette ein nokså lang prosess. Det er nærast eit poeng at det skal ta noko tid.
Utgreiingar skal gjerast, haldningar skal modnast og drøftast – demokratiet må få verke og av og til kan det ta litt tid.
Mykje merksemd
Det er mange arealsaker med mykje merksemd i kommunen nå.
Me kjem til å lage ei eigen oversiktsside på kommunen sin nettsider som syner status og informerer om prosess for desse sakene.
Vidare er postlista til kommunen open, der ligg all journalført informasjon.