Forslag til vedtekter for kommunale barnehagar

Frist for å senda innspel er 16. oktober 2026:

aase.markhus.berge@vindafjord.kommune.no

1.Verkeområde

Vedtektene gjeld for alle kommunale barnehagar i Vindafjord kommune og inneheld generelle føresegner om drift og annan informasjon som gjeld forholdet mellom foreldre og barnehagane.

2. Eigartilhøve og forvaltning

Vindafjord kommune eig eller leiger lokale for dei kommunale barnehagane og står ansvarleg for drifta.Dei kommunale barnehagane er: Sandeid, Vågen, Vats, Skjold, Vikebygd og Bjoa barnehage. Utval for oppvekst og omsorg (OPOM) er delegert mynde som politisk organ for barnehagesaker, innanfor rammene fastsette av kommunestyret.

3. Føremål

Vindafjord kommune sine barnehagar vert drivne i samsvar med § 1 Føremål i barnehagelova. Barnehagane skal drivast i tråd med føresegnene i barnehagelova, rammeplanen, samt andre forskrifter og retningslinjer fastsette av departementet, og kommunale vedtak og planar.

4. Foreldreråd, samarbeidsutval og barns medverknad

For å sikre eit godt samarbeid med heimen skal alle barnehagar ha eit foreldreråd og eit samarbeidsutval, jf. § 4 i barnehagelova. Viktige saker skal leggjast fram for foreldrerådet og/eller samarbeidsutvalet.

Foreldrerådet skal bestå av foreldra til alle barna.

Samarbeidsutvalet skal bestå av representantar for foreldra og dei tilsette i barnehagen, slik at kvar gruppe er likt representert. Samarbeidsutvalet skal vere eit rådgjevande, kontaktskapande og samordnande organ. Ved oppvekstsentera skal det etablerast eit felles samarbeidsutval som omfattar både barnehage og skule, i tråd med høvesvis § 4 i barnehagelova og § 10-9 i opplæringslova.

Samarbeidsutvalet skal ha 2 representantar for elevane, 1 representant for undervisningspersonalet, 1 representant for andre tilsette i skulen, 2 representantar for dei tilsette i barnehagen, 2 representantar for foreldrerådet i skulen og 2 representantar for foreldrerådet i barnehagen. Einingsleiar og 1 representant vald av kommunestyret er og med i samarbeidsutvalet

Barn i barnehagen har rett til medverknad, og alle handlingar og avgjerder som gjeld barna, skal ha barnet sitt beste som grunnleggjande omsyn, jf. barnehagelova § 3.

5. Opptak

Opptaket er samordna for alle kommunale og private barnehagar i kommunen. (Barnehagelova §12).Det skal søkjast om plass elektronisk via heimesida til kommunen. Søknadsfristen for hovudopptaket er 1. februar. Eigar, i samarbeid med einingsleiar/avdelingsleiar gjennomfører eit samordna opptak til nytt barnehageår.

Barn som ikkje får plass ved hovudopptaket, vert tekne opp fortløpande på ledige plassar gjennom året.

Barn som får barnehageplass, beheld plassen fram til 14. august det året dei byrjar på skulen. Det må søkjast på nytt dersom ein ønskjer å endre tilbodet. Barn som ønskjer utvida eller endra plass i sin barnehage, vert prioriterte framfor nye søkjarar.

Søkjarar som ikkje får oppfylt førstevalet sitt ved opptak, skal få høve til å stå på søkjarliste til denne barnehagen. Dersom det blir ledig plass i barnehagen i løpet av barnehageåret, skal søkjarar på søkjarlista prioriterast framfor søkjarar som ikkje står på lista, i samsvar med dei fastsette opptakskriteria. Barn med lovfesta prioritet ved opptak går føre. Retten til å stå på søkjarliste gjeld uavhengig av om føresette har takka ja til ein annan barnehageplass, jf. Forskrift om saksbehandlingsreglar ved opptak i barnehage §3.

6. Tilbod

Barnehagane har følgjande tilbod: 60% - 3 dagar pr. veke, 100% - 5 dagar pr. veke.

7. Opptakskriterium

a)Barn som det er gjort vedtak om etter barnevernslova §§ 5-1, 3-1 og 3-4 for, og barn med nedsett funksjonsevne, jf. barnehagelova § 18, har rett til prioritet ved opptak.

b)Søsken til barn som allereie har plass og som skal halde fram i barnehagen. Dette gjeld både søknader om overgang til annan barnehage og nye søkjarar.

c)Barn av flyktningar og minoritetsspråklege barn. Minoritetsspråklege barn vert prioriterte etter alder, slik at dei eldste barna får tildelt plass fyrst. Dokumentasjon skal leggjast ved søknaden.

d)Barn frå familiar som har store belastningar. Dokumentasjon skal leggjast ved søknaden.

e) Eldre barn blir prioriterte framfor yngre barn. 5-åringar siste året før skulestart.

f) Barn av tilsette ved den aktuelle barnehagen.

8. Klage på opptaket

Enkeltvedtak etter barnehagelova kan påklagast etter reglane i forvaltningslova kapittel VI. Klagefristen er tre veker frå den dagen parten mottok vedtaket eller fekk melding om vedtaket, jf. forvaltningslova § 29.

Klaga skal sendast til barnehagemyndigheita eller den instansen som har fatta vedtaket. Dersom vedtaket ikkje blir omgjort, skal saka sendast vidare til klageinstansen for endeleg avgjerd.

For vedtak om opptak gjeld reglane i barnehagelova §§ 16, 17 og 18, samt forvaltningslova sine reglar om klagebehandling.

9. Oppseiing

Oppseiingstida er tre månadar og vert rekna frå den 1. i kvar månad. Det må betalast for plassen i oppseiingstida. Barn som sluttar 1.august, må avvikle ferie innan denne månaden.

10. Foreldrebetaling

Kommunestyret fastset betalingssatsane for opphald i dei kommunale barnehagane. Utgifter til mat kjem i tillegg til opphaldsbetalinga. Føresette betaler for barnehagetilbodet i 11 månader per år, medan juli er betalingsfri månad.

Økonomiavdelinga sender kvar månad ut faktura etterskotsvis. Dersom betaling ikkje vert gjort innan fastsett frist, kan barnet miste barnehageplassen.

Gjeldande betalingssatsar finn du i kommunen sitt taksthefte for tenester.

11. Fritak frå foreldrebetaling, redusert foreldrebetaling og fråvær

Det er høve til å søkja om fritak frå foreldrebetaling av økonomiske grunnar. Det blir ikkje gitt reduksjon i betalinga om eit barn er borte frå barnehagen.

Barn som på grunn av sjukehusopphald eller alvorleg sjukdom er borte frå barnehagen i ein lengre periode, kan søkje einingsleiar om permisjon eller betalingsfritak for den perioden barnet er fråverande. Søknaden må dokumenterast med legeerklæring.

12. Barnehageåret, opningstid og opphaldstid

Barnehageåret varer frå 15. august til 14. august året etter. Barnehagane har normalt ope måndag–fredag kl. 06.45–16.30. Den enkelte barnehagen kan, etter dialog med foreldra, fastsetje redusert opningstid i periodar med lågt behov (t.d. i juli og desember). Eventuelle endringar skal vere tilpassa behovet til familiane og avklarast i samråd med foreldra.

Barnehagane er stengde to veker kvar sommar (veke 29 og 30), på lovfeste heilag- og fridagar, jule- og nyttårsaftan. Onsdag før skjærtorsdag stengjer barnehagen kl. 12.00.

Barnehagane har fem planleggingsdagar i året. Desse er fastsette i barnehageruta.

Foreldre skal gi melding så tidleg som mogleg dersom barnet er sjukt eller har fri. Det kan kjøpast ekstradagar ved ledig kapasitet.

13. Ferie

Alle barn skal ha fem veker ferie i løpet av barnehageåret, der minst tre veker skal takast ut som samanhengande ferie i perioden 15.juni – 15.august. Dette gjeld òg for barn som byrjar på skulen. Foreldre skal gi melding om kva tid barnet skal ha sommarferie innan 15.april.

Barnehagen er stengt 5 planleggingsdagar i året, desse dagane blir rekna som den 5.veka med ferie. Dei resterande feriedagane kan delast opp, barnehagen skal likevel ha melding om når barnet skal ha feriedag seinast to veker på førehand. Dette er nødvendig for å kunne tilpasse bemanninga til behovet.

14. Helse

Før eit barn byrjar i barnehagen, skal det leggjast fram ei erklæring om helsa til barnet, slik at barnehagen kan leggje forholda til rette for barnet. Dersom barnet har møtt til ordinære undersøkingar på helsestasjonen, kan slik erklæring givast av foreldra.

Personalet i barnehagen har plikt til å gjennomføre tuberkulosekontroll i samsvar med gjeldande regelverk, jf. barnehagelova § 50.

15. Bemanning

Barnehagen skal til ei kvar tid oppfylle gjeldande krav i barnehagelova og forskrift om pedagogisk bemanning og grunnbemanning. Barnehagen arbeider for å sikre stabil og kompetent bemanning til beste for barna.

16. Forsikring

Kommunen teiknar ulykkesforsikring for barn med barnehageplass i kommunale barnehagar.

Forsikringa gjeld medan barnet oppheld seg i barnehagen. Forsikringa omfattar berre personskadar, ikkje skade på personlege eigedelar som til dømes klede, vogn eller leiker.

17. Leike- og opphaldsareal

Barnehagen skal ha lokale og uteområde som er eigna for barnehagedrift og som gir barna høve til leik, aktivitet, læring og trivsel. Leike- og opphaldsarealet skal vere tilpassa talet på barn, alderen deira og opphaldstida i barnehagen. Kommunen fastset barnehagen sitt godkjende leike- og opphaldsareal.

18. Personvern

Barnehagen innhentar samtykke til nødvendig behandling av personopplysningar om barnet og føresette for å kunne tilby og administrere barnehagetenesta på ein god måte.

Samtykket gjeld så lenge barnet har barnehageplass, men kan når som helst trekkjast tilbake. Vindafjord kommune er behandlingsansvarleg, og opplysningane blir arkiverte i kommunen sitt arkivsystem i tråd med gjeldande regelverk.

Samtykke som ikkje omfattar sensitive personopplysningar, blir gitt gjennom Visma Flyt Barnehage.

19. Internkontroll

Som barnehageeigar har kommunen internkontroll for å sikre at krava i barnehagelova med forskrifter blir følgde.

Barnehagane følgjer regelverket for internkontroll og har eit internkontrollsystem som er tilpassa storleiken og eigenarten til barnehagen, jf. barnehagelova § 9.

20. Barnehagen sine plikter

Teieplikt: Personalet i barnehagen er underlagt teieplikt etter reglane i forvaltningslova §§ 13 til 13 g, jf. barnehagelova § 44.

Opplysningsplikt: Utan hinder av teieplikta har personalet opplysningsplikt til sosialtenesta, den kommunale helse- og omsorgstenesta og barnevernstenesta, jf. barnehagelova §§ 45 og 46.

21. Endring av vedtekter

Vedtektene blir vedtatt i kommunestyret. Vedtektene kan endrast av kommunestyret. Gjeld frå 01.01.2027. 

Frist for å senda innspel er 16. oktober 2026:

aase.markhus.berge@vindafjord.kommune.no