Motorfartøy eller luftfartøy
Ved særlege grunnar kan kommunen gje løyve for
- bestemte høve
- bestemte tidsrom
Kommunen kan setta vilkår for løyvet.
Ved vurdering av om særlege grunnar ligg føre, vil det ha betydning om motorferdselen er nødvendig og har eit nytteformål, eller ber preg av unødvendig køyring eller for å ha det moro.
I Vindafjord blir slike søknadar behandla av Eining areal og forvaltning. Søknad skal sendast til landbruk@vindafjord.kommune.no
Motorkøyretøy på barmark
I unntakstilfelle kan kommunen gi løyve
- ved særlege behov
- når køyringa ikkje er knytt til turkøyring
- når transport ikkje kan løysast på annan måte
Transportbehovet skal vurderast mot moglege skadar og ulemper i forhold til å redusera motorferdselen til eit minimum.
Slike søknadar skal handsamast politisk. I Vindafjord blir søknadane behandla av Utval for drift, utvikling og kultur (DUK). Søknadar skal sendast til postmottak@vindafjord.kommune.no, og må leverast i god tid.
Møteplanen til DUK finn du her.
Hovudregelen
Hovudregelen i Noreg er at motorisert ferdsel i utmark og vassdrag er forbode. Dette gjeld både på barmark og på snødekt mark, og på både opne og islagte elver og vatn.
Også elektriske køyretøy er omfatta av forbodet. Desse støyar mindre, men kan likevel føra til skadar og ulempe for natur og friluftsliv.
Unntak
Unntak er enkelte elektriske syklar og bruk av båt med elektrisk motor på vatn mindre enn 2 kvadratkilometer
Elektriske syklar: Med elektriske syklar meinar ein syklar som er utstyrt med elektrisk hjelpemotor med maksimal nominell effekt på høgst 0,25 kW, og der effekten blir redusert gradvis ved aukande fart og opphøyrer ved 25 kilometer i timen eller tidligare om syklisten sluttar å trø. Sykkelen kan ved motorkraft aleine nå ein maksimal fart på 6 kilometer i timen.
Kommunen kan i forskrift begrensa eller forby bruk av elektriske syklar i heile eller deler av utmarka.
Elektrisk motor på vatn: Kommunen kan gi forskrift eller fatta enkeltvedtak om adgang til bruk av motorfartøy med elektrisk motor med inngangseffekt opptil 800 watt på innsjøar mindre enn 2 kvadratkilometer.
Ved vurderinga av om det skal opnast for slik ferdsel, skal det leggast vekt på omsynet til vatnet som levestad for viltartar og fuglar, og særskilt vekt på omsynet til hekkeområde. Det kan ikkje gjevast adgang til motorferdsel som inneber vesentleg skade på fugleliv.
Reglar for heile landet
Motorferdsel i utmark kan ha stor nytteverdi, men kan samtidig gi skade på terreng, forstyrra fugle- og dyreliv, og føra til konflikt med folk som utøver friluftsliv.
For å minimera ulemper frå motorisert ferdsel i skog og fjell, er det eit regelverk som regulerer motorferdsel i utmark og vassdrag:
Regulering av motorferdsel i utmark