Ut på tur i Vindafjord 2023

Utsikt frå Nordre Baslifjell Ingrid Johannessen

Ølensvåg - Ormåsen 518 moh.

Tilkomst og parkering

Frå Ølensvåg (gamleskulen):
Ta av frå E134 i Ølensvåg og køyr mot Bjoa. Etter om lag 300 meter, ta av til venstre ved busslomme og følg Duelandsvegen til parkeringsplass. Du kan og parkera nede ved Bjoavegen.

Frå Berge:
På vekedagar etter kl. 16.00, samt i helgene, er det høve til å parkera ved Granberg Garveri. I arbeidstida er parkering her forbeholdt Granberg Garveri sine tilsette. Ta av frå E134 i Ølensvåg og køyr omlag 1,9 kilometer mot Bjoa. Følg gang- og sykkelvegen 300 meter tilbake mot Ølensvåg. Gå inn på grusveg som fører til vassverket sitt anlegg. Følg merke vidare, først på skogsveg, og den siste strekninga på sti.

Frå Vaka:
Ta av frå E134 i Ølensvåg og køyr omlag 7 kilometer mot Bjoa. Ta til venstre opp skogsbilvegen som fører til Vakadalen og parker etter 150 meter. Følg merke vidare, først på skogsveg og den siste strekninga på sti (den same stien som kjem frå Berge).

Hugs bandtvang og vis omsyn.

Om turen

Over halve turen går på skogsbil- og traktorveg uansett kvar du startar. Deretter er det nokså tørre stiar, men parti med fuktig terreng. Stiane skiftar mellom lett terreng og nokre bratte stigningar. På toppen kan du nyta flott utsikt over Ølensvåg og nabobygdene.

Avstand

7,6 kilometer tur/retur frå Gamleskulen
6,2 kilometer tur/retur frå Berge
10,5 kilometer tur/retur frå Vaka

Tidsbruk

Mellom 2,5 til 4 timar tur/retur, varierande etter startpunkt.

Vanskegrad

Ut.no - frå Gamleskulen i Ølensvåg

Digitalt turkart

Ut.no - frå Berge

Ut.no - frå Vaka - alt. 1

Ut.no - frå Vaka - alt. 2

Utsikt frå Ormåsen Pål Viland Monstad

Sandeid - Hest 552 moh.

Tilkomst og parkering

Frå Fjellstøl:
Ta av Sandeidvegen mellom Ølen og Sandeid ved kyrkja i Sandeid, og køyr inn på Helgelandsvegen. Etter om lag 3 km, ta av til venstre mot Fjellstøl og følg vegen heilt til endes til parkeringsplass. Parkeringsavgift: 50 kroner per døgn for bilar under 6 meter, og 100 kroner per døgn for bilar over 6 meter. Betaling med Vipps eller kontanter i konvolutt.

Frå Opheim:
Ta av frå E 134 inn på Olalivegen ved Fikse, og køyr til parkeringsplass. Parkeringsavgift: 75 kroner per døgn. Du kan betale med Easypark eller Vipps. Det er info om betaling på parkeringsplassen.

Om turen

Frå parkering på Fjellstøl, eller Opheim, føl ein merka grusveg inn mot DNT si hytte i Olalia. Etter å ha passert Røde Kors-hytta og kome opp på kammen 200 meter etterpå, skal grusvegen følgast rundt 500 meter før ein ser merkinga til høgre mot Hest. Turen opp til Hest går først forholdsvis flatt innover, før det stig oppover mot toppen. Frå toppen ser ein både Sandeidfjorden og Ølensfjorden. Frå toppen går ein vidare på merka sti nedover sørsida av fjellet. Nede ved Grasdalsmyra tar ein til høgre og følgjer stien over Haukareid tilbake til Fjellstøl.

Avstand

6,4 kilometer rundtur

Tidsbruk

Om lag 1,5 time rundtur

Vanskegrad

Hest sett frå Opheim Aleksander Vølstad

Utsikt frå Hest Nils Tokheim

Imsland - Akslandsstølen 433 moh.

Tilkomst og parkering

Ta av frå E134 i rundkjøringa ved Knapphus, og følg Fylkesveg 46 (Saudavegen) inn til Akslandstunellen. Parkering på høgre side før tunellen.

Om turen

Kryss vegen og følg skogsveg oppover. Vegen går bratt oppover til Skolleskar, og går vekselvis på skogsveg og sti. Det er fleire våte parti frå Skolleskar og inn til stølen. Kassen er plassert på Akslandsstølen. Her finn du også merka tur opp til Akslandsnuten (821 m.o.h) viss nokon vil ha ein lengre tur. Denne turen tar ca. 2,5 timer tur/retur i tillegg.

Avstand

Omlag 3,5 kilometer (tur/retur).

Tidsbruk

Omlag 2 timar (tur/retur).

Vanskegrad

Marit Svandal

Skjold - Storafjellsnibba 501 moh.

Tilkomst og parkering

Ta av frå E 134 i plankryss til Skjold og ta til høgre i rundkjøring retning Nedstrand. Følg riksveg 513 til du kjem til krysset for Åmsosen og Nedstrand. Her kan du parkere ved murhus i krysset. Ein kan også parkere ca. 150 meter på venstre side i ei lomme i retning Nedstrand frå krysset. Turstien starter frå krysset ca. 50 meter i retning Nedstrand på venstre side.

Om turen

Stien starter ved skilt med ”tursti” ca. 50 meter i retning Skjoldastraumen på venstre side. Stien går gjennom furu- og lauvskog heilt opp til Skrubbahaugen 280 moh. Noko myrlendt enkelte plasser. Me går gjennom Glimmergruvene kor informasjonstavla står. Etter Skrubbahaugen går ein delvis på berg og sti opp mot toppunktet Vardafjell 377 moh. Fortsett vidare på stien i retning mot Vats, ned i dalen og mot Giskaskaret. Her dreier ein mot høgre og følgjer merka sti oppover mot Storafjellsnibba. Når ein kjem opp på toppen, har ein eit flott utsyn over Skjoldafjorden og Haugalandet. Turkassen ligg ved varden. Same veg tilbake.

Avstand

10 kilometer tur/retur

Tidsbruk

Mellom 2,5 til 4 timar tur/retur, varierande etter startpunkt.

Vanskegrad

Storafjellsnibba via Vardafjellet

Digitalt turkart

På ut.no finn du 2 ulike turar til Storafjellsnibba:

Storafjellsnibba frå Giskedalen

Utsikt frå Storafjellsnibba Siri Nonslid

Ølen - Steinslandsnuten 514 moh.

Tilkomst og parkering

Følg vegen mellom Sandeid og Ølen. Sjå etter skilt for tursti og Stuhaug Turisme (Sandeidvegen 453). Følg skilt til parkeringsplass ved Stuhaug Turisme.

Om turen

Frå parkeringsplassen følgjer du traktorvegen om lag 2,5 kilometer. Dette er same veg som stien til Aurdal. Vegen stig bratt første delen. Når du kjem opp på den første flata er det merka utsiktspunkt. Her er det ein benk for å ta seg ein rast med god utsikt over dalen ned mot Sandeid. Etter utsiktspunktet er det framleis litt stigning før traktorvegen flatar ut. Stien tar av frå traktorvegen og går opp på vestsida av toppen. Turen går nesten rundt Steinslandsnuten før du kjem til toppen.

Avstand

Om lag 8 kilometer tur/retur.

Tidsbruk

2-3 timar tur/retur.

Vanskegrad

Utsikt frå Steinslandsnuten Pål Viland Monstad

Vats - Langs ei å 301 moh.

Tilkomst og parkering

Køyr 2,5 kilometer frå Knapphus mot Ølen, til vegkryss der det står skilt til Blikrabygda. Ta av mot Blikrabygda og følg fylkesveg 737 om lag 3,5 kilometer forbi ei stor raud løe like ved vegen og eit bedehus. Om lag 150 meter nedanfor bedehuset kjem du til ei bru med parkeringsplass, benk, skilt og informasjonstavle om turen.

Om turen

Følg merka sti frå parkeringsplassen langs Blikraelva som renn ut i Vatsvatnet nede ved Refsnes. Stien er godt skilta og har fleire informasjonstavler om kvernhus, kraftverk og oppgangssag. Når du kjem opp til Kraftverksinntaket på om lag 300 moh., finn du turkasse og ein kvilebenk. Etter ein pause kan du velja om du vil gå ned igjen same vegen, eller på andre sida av elva. Her er det god traktorveg til parkeringsplassen på Blikra. Det er også merka tur opp til Vardafjell (661 m.o.h) viss nokon vil ha ein lengre tur. Denne turen tar ca. 2 timer tur/retur i tillegg.

Avstand

Omlag 4 kilometer (tur/retur).

Tidsbruk

Omlag 2,5 timar (tur/retur).

Vanskegrad

Turkart (PDF, 5 MB)

Kvilebenk ved turkassen lang ei å Jon Olav Velde

Vikebygd - Juten 411 moh.

Tilkomst og parkering

Ta av E 134 ved Isvik og følg Vikevegen (fylkesveg 734) om lag 16,5 km til Skartland. Her finn du parkeringsplass på høgre side av vegen.

Om turen

Turen startar nede ved fylkesvegen. Følg skogsveg mot nord, gå den til endes.

Skogsvegen tar slutt ved ei grind, like etter dette sving skrapt mot vestre (nord), følg deretter stien til toppen av Såta. Frå Såta, ta sørover og følg skilt og merkepinnar til toppen på Juten. Frå Juten er det flott utsikt over Skartland, Ålfjorden og Sunnhordalands-bassenget. Ein kan også gå vidare til Dyraskorsfjell (531 moh.) viss nokon vil ha ein lengre tur. Denne turen tar ca. 1-2 timer tur/retur i tillegg. Følg same veg tilbake til turstart.

Avstand

5,2 kilometer (tur/retur).

Tidsbruk

Om lag 2,5 time (tur/retur).

Vanskegrad

Turkart (PDF, 5 MB)

Roald Årvik

Vikedal - Ulvavollsnuten 562 moh.

Tilkomst og parkering

Frå Vikedal sentrum tek du av fylkesveg 46 og køyrer mot Roaldkvam (fylkesveg 745). Køyr rett fram ved første bru og forsett vidare på fjellgardvegen. Etter om lag 7 km frå Vikedal sentrum kjem du til Låkafossen, der turen startar. Parkeringsplass, samt turtavle med informasjon, finn du på høgre side av vegen før brua.

Om turen

Frå Låkafossen følgjer du merka sti inn på traktorveg. Eit stykke oppe i lia kjem du til Ole`s steinbu. Ta til høgre ved steinbuene. Etter om lag 150 meter kjem du fram til ein fin utsiktsplass – Geitahedla. Turen vidare frå steinbuene går på traktorveg som går over til sti. Etter nokre hundre meter kjem du til eit skilt som viser veg til Ilstveit og Imsland, samt rundtur rundt Ulvavollsvatnet på vel 2 km. Forsett vidare på stien rett fram til du kjem ned til nordenden av Ulvavollsvatnet, og følg skilt til venstre når du passerer ei hytte. Etter omlag 750 meter, tar du av stien til høgre. Herifrå går stien bratt oppover fjellryggen, og det er eit strekke kor det er mogleg å halde seg i tau. Etter om lag 1.5 kilometer er du framme ved toppen. Følg stien tilbake til krysset, og gå enten same veg tilbake, eller ta til høgre og følg merka sti via Koladalen på vel 3,4 km tilbake til turstart.

Avstand

8,4 kilometer tur/retur

Tidsbruk

Mellom 3 til 4 timar tur/retur.

Vanskegrad

Turkart (PDF, 4 MB)

Digitalt turkart

Følg Vadhytta på Facebook!

På veg til Ulvavollsnuten Kjetil Austrheim

Tilrettelagte turar 2023

Bjoa - Vadhytta (Dagsturhytta) 272 moh.

Tilkomst og parkering

Du kan nå Vadhytta både frå Bjoa og Ølensvåg.

Frå Bjoa: Ta av frå Bjoavegen ved skiltet til Dalen og følg Eikåsvegen nesten til endes. Like før brua i Eikås, ta av til venstre og følg skogsbilveg opp til parkeringsplass. Her er det skilta til Vadhytta.

Frå Ølensvåg: Ta av E 134 inn på Bjoavegen. Etter om lag 300 meter, ta av til venstre og følg Duelandsvegen til parkeringsplass. Du kan også parkera nede ved Bjoavegen, der du tar av til Duelandsvegen.

Om turen

Både frå Bjoa og Ølensvåg er det god grusveg. Frå Bjoa går turvegen i lett terreng, godt eigna for sykkel, barnevogn og rullestol. Frå Ølensvåg er det eit bratt stykke i starten som flatar ut på toppen.

Dagsturhytta

Dagsturhytta i Vindafjord har fått namnet Vadhytta. Målet med dagsturhytta er aktiv fritid for alle. Både tilkomstveg og sjølve hytta med toalett-fasilitetar er universelt utforma. Dagsturhytta skal kunne nåast av flest mogleg, uavhengig av helse og kondisjon. Samstundes skal det vera eit attraktivt turmål å besøka fleire gonger, også for røynde turgåarar. Du vil og finna eit «mini»-bibliotek i hytta som vart drifta av Vindafjord bibliotek.

Avstand

Bjoa: Omlag 2,8 kilometer (tur/retur).
Ølensvåg: Omlag 7,3 kilometer (tur/retur) frå starten av Duelandsvegen.

Tidsbruk

Bjoa: Omlag 40 minutter (tur/retur).
Ølensvåg: Omlag 2 timar (tur/retur) frå starten av Duelandsvegen.

Vanskegrad

Bjoa: Tilrettelagt

Ølensvåg: Middels

Turkart (PDF, 4 MB)

Vadet ved Vadhytta Berit Hetland

Vats - Fjellgardsbakken i Aurdalsdalen

Tilkomst og parkering

Ta av frå E 134 inn på Aurdalsvegen ved tidlegare gartneri. Følg vegen til endes 1,4 kilometer. Her finn du parkeringsplass og infotavle med opplysningar om ulike turar innover dalen. Alle turane har felles utgangspunkt herifrå på god traktorveg.

Om turen

Turen går på god grusveg langs elva oppover forbi Sagflåta, over Kleiva bru og vidare gjennom gran- og furuskog i slakt terreng til du kjem til Aurdalselva på ny. Ved brua på Fjellgardsbakken er det sett opp benk og vippe for ungar og turkasse med bok i. Dersom du vil, kan du gå over brua og følgja vegen vidare 600 meter oppover, då kjem du til ein ny rasteplass ved Tverrelva. Dette er ein fin tur i bjørkeskog, men vegen går i litt brattare terreng.

Gjennom Aurdalsdalen var det ferdselsveg frå Øvre Vats til Sandeid i gamle dagar. I dag går det traktorveg innover nesten heilt over til Steinsland i Sandeid. Det manglar veg berre eit kort stykke.

Avstand

Om lag 3,4 kilometer tur/retur.

Tidsbruk

Omlag 1,5 time tur/retur.

Vanskegrad

Tilrettelagt
Forklaring til fargekodane (PDF, 178 kB)

Fjellgardsbakken Jon Olav Velde

Vikedal - Rundtur Holmen - Kyrkjehølen

Tilkomst og parkering

Følg fylkesveg 46 til Vikedal. I Vikedal sentrum tar du av til idrettsplassen og parkerer der. Her startar turen og du finn informasjonstavle mellom bygdahuset og kunstgrasbanen.

Om turen

Følg løype som vist på kartet. Start med å gå forbi kafédelen på bygdahuset, og ta til høgre ved kunstgrasbanen. Her kjem du til eit kryss kor du tar til venstre. Følg vegen til båthamna som det er verdt å ta ein tur innom, og fortsett vidare til campingplassen. Ved den første campingvogna kan du kan ta ein avstikkar ned til den flotte stranda. Fortsett om lag 50 meter inn på campingplassen, og ta til venstre opp bakken til «nye» Holmen bustadfelt. Hold mot høgre og gå rett fram til vegen går over til grusveg i enden av feltet. Fortsett vidare til du kjem til ei trebru som går over Kyrkjehølen. Du passerer ein lavvo og fortsett vidare på grusvegen langs Kyrkjehølen. Ta til høgre mellom grasbanen og sandvolleyball-anlegget, og fortsett vidare fram tilbake til der turen starta.

Avstand

Omlag 1,4 kilometer (rundtur).

Tidsbruk

Omlag 45 minutt (rundtur).

Vanskegrad

Tilrettelagt
Forklaring til fargekodane (PDF, 178 kB)

Brua ved Kyrkjehølen Lillian Austrheim

Skjold - frå Isvik mot Trovåg

Tilkomst og parkering
Ta av frå E 134 i Isvik og køyr inn på Vikevegen (Fylkesveg 734). Parker i sentrum av Isvik (ved Kiwi).

Om turen
Turen startar og sluttar i Isvik. Følg sykkel- og gangsti langs Vikevegen mot Vikebygd. Turen startar med jamn og svak stigning dei første kilometerane. Ein går forbi tidlegare Langeland Bakeri, Skjold trevare og vidare oppover mellom gardane langs Haakull. Når ein kjem til vegkrysset på Skogagjerdet, fortsett ein vidare rett fram på sykkel- og gangstien. Når ein kjem til busstoppet ved «Lykkepoten hundehotell», finn ein turkasse med kodeordet for turen. Ønsker ein å gå heile sykkel- og gangstien til Trovågsfeltet, fortsett ein vidare langs Malasetvatnet. I enden av sykkel- og gangstien, kan ein krysse over vegen til Trovågfeltet og ta ein kikk på den flotte utsikten over Ålfjorden. På fine kveldar kan ein nyta synet av flotte solnedgangar her.

Avstand
4,8 kilometer tur/retur til postkasse, og 8 kilometer tur/retur til Trovåg.

Tidsbruk
1,5 - 2,5 time.

Vanskegrad

Tilrettelagt
Forklaring til fargekodane (PDF, 178 kB)

Siri Nonslid

Imsland - Ørevikvegen

Tilkomst og parkering
Ta av frå Fylkesveg 46 (Saudavegen) i Ølmedal og følg skilt til Imsland kyrkje. Parker nede ved kyrkja. Du kan også parkera oppe ved bygdahuset i Ølmedal.

Om turen
Ørevikvegen er ein del av den gamle hovudvegen mellom Haugesund og Sauda. Vegen vart rusta opp som eit kulturminne på 1990-talet. Turen startar ved gardstunet på Imslandsgarden. Mesteparten av turen går på grusveg, men det er asfaltert bilveg fram til starten på Ørevikvegen. Langs vegen er det informasjonsskilt om vegen, planter og tre, samt rasteplassar med benkar. Turkassen finn du ved rasteplassen i siste del av turvegen. Etter turen er det fint å ta turen ned til Imslandsjøen for å bada.

Avstand
4,5 kilometer tur/retur

Tidsbruk
Om lag 1 time tur/retur

Vanskegrad

Tilrettelagt
Forklaring til fargekodane (PDF, 178 kB)