Det er Norsk Tipping og Norsk kulturskoleråd som står bak Drømmestipendet, som blir delt ut for 18. gong i år. Søkarane blir vurderte og nominerte av kommunen dei har vakse opp i. I år vart det sett to nye rekordar: 802 søkarar og over 600 nominerte frå kommunane.
Frå Vindafjord var det nominert fire kandidatar til stipendet: Jarle Lunde, Lydia Helland Haugan, Lyth Bendik Hole og Agnes Sesilia Andersen. Alle i kategorien musikk.
Meir om dei nominerte kan du lesa her
Vanskeleg jobb for juryane
I år er det gjort tre endringar i Drømmestipendet. Stipendbeløpet er dobla frå 15.000 til 30.000 kroner, tallet på stipend er redusert frå 100 til 50, og aldersgruppa som kan søka er endra frå 13-20 til 18-25 år. Men målet med stipendordninga er som før:
Drømmestipendet skal gi verdfull inspirasjon og anerkjenning, og bidra til at mange unge kunst- og kulturutøvarar får oppfylt sine draumar. I tillegg ønskjer stipendutdelarane å synleggjera kommunane sitt arbeid for unge kunst- og kulturutøvarar.
Fagjuryen besto av Frida Ånnevik, Tine Thing Helseth, Ola Kvinberg, Silja Nymoen og Torodd Wigum. I draumejuryen sat Trond Olav Asperud, Sigrun Agøy Engum og Egil Hofli. Saman hadde dei den vanskelege jobben med å velja ut kven som skulle få stipend.
Utdeling i Sjøperlo hall søndag
Frå Vindafjord er Agnes Sesilia Andersen den heldige. Stipendet blir delt ut av representantar frå Norsk Tipping og Kulturskulerådet, søndag 30. mai i Sjøperlo hall.
Utdelinga startar klokka 18.00. Vil du vera med, må du ringa 90 16 60 95 innan klokka 12.00 laurdag 29. mai.
Det vert musikalsk innslag ved elev i kulturskulen og av stipendvinnaren.