- Dersom du skal søka eleven fri 1-2 dagar, skal fråvær meldast frå om i den digitale meldingsboka
- Dersom du skal søka eleven fri meir enn 2 dagar må det søkast elektronisk i føresettportalen.
- Vel barnet det gjeld, klikk på søknader og vel så “søk om permisjon”.
- Søknaden går til rektor/einingsleiar (søknad må vera sendt i god tid før fråværet, normal handsamingstid er 14 dagar).
- Dersom du skal søkja eleven fri meir enn 10 kalenderdagar vil eleven bli skriven ut av skulen.
Forskrift om permisjon frå grunnopplæringa Vindafjord kommune (KS 38/24)
Fastsett av Vindafjord kommunestyre 18. juni 2024, sak 038/24, med heimel i lov 9. juni 2023 nr. 30 om grunnskulen og den vidaregåande opplæringa (opplæringslova) § 2-2.
§ 1 Formål og verkeområde
Forskrifta gir informasjon om reglar for permisjon frå grunnopplæringa.
Elevane har, etter opplæringslova § 2-2 plikt til å møta på skulen dei fastsette skuledagane.
Forskrifta gjeld for alle elevar ved alle grunnskular i Vindafjord kommune.
§ 2 Vilkår for permisjon
Elevar kan kun få permisjon dersom opplæringa samla sett er forsvarleg. Kvar enkelt søknad vert handsama individuelt. Rektor/einingsleiar ved skulen vurderer om ein elev får innvilga permisjon. Døme på kva kriterier skulen vurderer etter:
- Eleven si læring
- Skulen sitt undervisningsopplegg i permisjonstida
- Eleven sitt tidlegare fråvær
Det vert ikkje gitt permisjon i periodar med førebuing eller gjennomføring av:
- Nasjonale kartleggingsprøvar 1.-3. trinn
- Nasjonale prøvar 5., 8. og 9. trinn
- Tentamen og eksamen på ungdomstrinnet
§ 3 Øvre grense for permisjon
I grunnskulen i Vindafjord skal det ikkje innvilgast permisjon i meir enn 10 skuledagar per skuleår. Rektor ved skulen kan innvilga permisjon i inntil 10 dagar. Ved meir enn 10 dagar fri må elevane skrivast ut av skulen.
§ 4 Søknad om permisjon
Søknadar som gjeld permisjon for inntil 2 dagar vert handsama av kontaktlærar. Søknadar som omfattar meir enn to dagar, vert handsama av rektor/einingsleiar.
Ein skriftleg søknad må koma skulen i hende i god tid (minst 14 dagar) før fråvær.
For å få permisjon etter opplæringslova § 2-2, må det leggjast til grunn ein søknad som er godt grunngjeven.
§ 5 Iverksetjing og opphøyr
Forskrifta tredde i kraft 1. august 2024
Forskrift om permisjon frå grunnopplæringa i Vindafjord kommune PDF (KS 38/24) (PDF, 155 kB)