No, når Thea skal ut i permisjon, søkjer Sandeid fengsel ein vikar som kan ta over ei rolle ho sjølv har funne både utfordrande, lærerik – og djupt meiningsfull.
– For mange kan dette vera ein fin måte å få prøvd seg som leiar på. Det er eit vikariat, og ein får høve til å testa rolla i trygge rammer, med god støtte rundt seg, seier ho og legg til:
– Dette er ein jobb der du får bruke både fagkunnskap, menneskekunnskap og leiareigenskapar.
Kristine Thorsen Eikeland
Midt i blinken
Thea Lovise er sjukepleiar med vidareutdanning, og har bakgrunn frå akuttmottaket ved Stavanger universitetssjukehus.
Etter fleire år i byen voks ønsket om å flytta heim.
Då ho og sambuaren fekk tomt i Etne, og planane om å byggja hus blei konkrete, byrja ho å sjå etter jobb i nærområdet.
– Eg søkte på fleire stillingar, men då eg kom over denne, kjende eg raskt at ho passa meg. Stillingsbeskrivinga trefte overraskande godt, og eg valde å satsa fullt og heilt på denne moglegheita.
Vikariat ledig som avdelingsleiar i helseavdelinga i Sandeid fengsel
Vanskeleg å sjå føre seg
Ho legg ikkje skjul på at ho var spent då ho starta.
– Eg visste ikkje heilt kva eg sa ja til. Eg hadde fått god informasjon, men dette er jo ein heilt annan måte å jobba på enn på sjukehus. Før eg starta var det litt skummelt, og vanskeleg å sjå føre seg korleis kvardagen faktisk ville bli.
Jobbar tett med kjekke og dyktige folk
I dag omtalar ho arbeidsplassen som både trygg og utruleg kjekk.
– Det er ein veldig kjekk jobb, og eg opplever eit kjempegodt samarbeid – både internt i fengselet og med andre instansar.
Som avdelingsleiar har ho ansvar for personal og drift, samstundes som ho er tett på det kliniske arbeidet.
– Ein er ikkje berre leiar. Me jobbar tett saman i ei lita personalgruppe, og er alltid to på jobb. Det gir tryggleik, og ein står aldri åleine i vurderingane som må takast.
Vikariat ledig som avdelingsleiar i helseavdelinga i Sandeid fengsel
Tett på menneske – og heile livssituasjonen deira
Helseavdelinga i Sandeid fengsel fungerer på mange måtar som eit lite legekontor. Her får dei innsette hjelp til vanleg helsehjelp, i tillegg til oppfølging innan psykisk helse og rus.
– Det er eit veldig breitt spekter av problemstillingar, og ein får verkeleg brukt kompetansen sin. Mange har òg behov for å snakka med nokon, så samtalar er ein viktig del av jobben.
Thea Lovise Strømø utanfor Sandeid fengsel
Kristine Thorsen Eikeland
Godt tverrfagleg samarbeid
Sandeid fengsel er eit ope fengsel. Arbeidet skjer i tett samarbeid med mellom anna lege, fysioterapeut, lærarar og sosionomar.
– Me er tett på menneska og helsa deira i kvardagen, og det gjer jobben både utfordrande og djupt meiningsfull.
Ho peikar på at ingen dagar er like.
– Ein må ofte snu seg raskt rundt, og det skjer mykje i løpet av ein dag. Eg trivst godt med det. Du må vera glad i å jobba med menneske, og komfortabel med å møta folk i ulike livssituasjonar.
Ei moglegheit til å veksa – også som leiar
For Thea Lovise var leiarrolla ny.
– Eg hadde ikkje leiarerfaring frå før, men eg har fått god støtte og har fått veksa med oppgåvene. Det har vore veldig lærerikt.
Arbeidstida er dagtid, måndag til fredag, utan kveld-, natt- eller helgearbeid.
– Det gjer det mogleg å kombinera jobb med familieliv og fritid, noko eg set stor pris på.
Heime er best
Rett før jul flytta ho og sambuaren inn i det nye huset i Etne.
– Me er framleis i innflyttingsfasen, men det kjennest veldig rett å vera heime igjen. Det er kjekt å bu vekke, men heim er best.
Når ho no førebur permisjon, håpar ho at ein ny vikar vil få same gode opplevinga som ho har hatt.
– Dette passar for deg som vil ha ein jobb med meining, ansvar og faglege utfordringar – og som har lyst til å prøva deg i ei leiarrolle. Eg trur mange vil trivast veldig godt her.
Vikariat ledig som avdelingsleiar i helseavdelinga i Sandeid fengsel