Vil du forstå valet betre? Bli med på valkurs!

No inviterar Etne og Vindafjord kommune til eit felles valkurs for alle som vil lære meir om stortingsvalet.

– Me prøver å arrangere eit valkurs i år som eit samarbeid mellom Vindafjord og Etne kommune. Dette er noko me brenn for, seier Miriam Aareskjold, avdelingsleiar for Integreringstenesta i NAV Vindafjord–Etne.

– Me ønskjer at deltakarane skal sitje igjen med tillit til valprosessen og ei betre forståing av kva partia står for, seier Miriam Aareskjold, avdelingsleiar for Integreringstenesta i NAV Vindafjord–Etne. Kristine Thorsen Eikeland

Kurset er ope for alle, men særleg retta mot første- og andregongsveljarar og innvandrarar med stemmerett. 

Målet er å auke valdeltakinga i grupper som ofte er underrepresenterte.

– Innvandrarbefolkninga utgjer ein stor del av dei som bur her – rundt 15 prosent i Vindafjord og 13 prosent i Etne. Det er viktig å få deira stemme med, seier Aareskjold.

Valstyra i begge kommunane deltek, og det blir korte innlegg frå lokale politikarar som fortel om partia sine kjernesaker i årets val. 

Kurset skal vere ein trygg og informativ møteplass for alle som vil lære meir.

– Me ønskjer at deltakarane skal sitje igjen med ei kjensle av at dei stolar på valprosessen i Noreg, og at dei forstår betre kva dei ulike partia står for. Me håpar òg at fleire får lyst til å engasjere seg i politikk, seier Aareskjold.

– I eit demokrati er det viktig å få med alle. Me ønskjer at fleire skal bruke stemmeretten sin, og kjenne at dei høyrer til, legg Beate Hetleflåt, valansvarleg i Etne kommune, til.

Meld deg på her