Velkomen til foreldrekurs våren 2026

MabelAmber, Pixabay

Har du kjent på kjensla av å ikkje strekkja til? Minstebarnet gret, og du forstår ikkje kvifor. Treåringen vrir seg misnøgd på golvet, og du lurer på om du skal gi nærleik, gi etter eller setja grenser.

Du er ikkje åleine om å vera usikker. Kva er det eigentleg barnet prøver å fortelja?

For deg som ønskjer meir tryggleik og forståing i foreldrerolla, tilbyr Vindafjord kommune no kurs i Circle of Security–Parenting (COS‑P).

Målgruppe

Foreldre busett i Vindafjord kommune, med barn i alderen 3-10 år. 

Om kurset

Circle of Security–Parenting (COS-P) er eit foreldreveiledningsprogram som byggjer på 50 års forsking innan tilknytingsteori. Kurset passar for alle. Du treng ikkje oppleva foreldrerolla som vanskeleg eller ha barn med særskilde behov for å delta.

Føremålet med kurset er å gjera deg som forelder meir medviten på å sjå, tolka og møta behova til barnet ditt, og å bli merksam på eigne haldningar, kjensler og handlingar i samspelet med barnet.

Kurset er delt opp i åtte kapittel. Me nyttar filmklipp av andre foreldre og barn som utgangspunkt for dagens tema og reflekterer saman i gruppa. Barn skal ikkje vera med på kurset.

Kurset er gratis.

Kurslokalet blir bestemt ut frå kva bygd det er flest påmelde.

Kurshaldarane er helsesjukepleiar Synnøve Lovra Viskjer og familierettleiar Elin Gravelsæter.