Prosjektet skal sikre reservevatn, betre brannberedskap, utbygging av fiber og styrka infrastruktur – eit samla løft for både innbyggjarar, næringsliv og framtidig beredskap.
Bakgrunnen for prosjektet er nye nasjonale krav frå styresmaktene. Alle kommunar må no ha to uavhengige og operative vasskjelder – altså reservevatn – for å sikre forsyninga dersom ei kjelde fell bort.
Dette inneber at det må vere to ulike vasskjelder på to ulike stader, og dermed to operative vassverk.
Vassbakk og Stol
Løysinga blir samspel mellom Vats og Skjold
Løysinga i Vindafjord blir eit samarbeid mellom vassverka i Vats og Skjold. Dei to bygdene skal kunne forsyne kvarandre med vatn ved behov.
Dette krev bygging av nye leidningsnett og infrastruktur, samstundes som eksisterande vassforsyning må haldast i drift – noko som er ekstra viktig i eit område med mange bønder som treng vatn døgnet rundt.
Prosjektet i tre delar
Prosjektet er delt inn i tre hovuddelar:
· Samarbeid med Fagne AS og Haugaland Kraft Fiber – det skal leggjast både vassleidning og høgspentleidning frå Solheim i Skjold til Krakk i Vats. Det skal òg leggast fiber.
· Vassleidningar og høgspent – om lag 4 km med vassleidning og 4 km med høgspentleidning skal leggjast ned i bakken.
· Knapphus industriområde – her skal det byggast eit høgdebasseng for å sikre brannvatn og betre kapasitet.
Framdrift og samarbeid
Planlegginga har pågått i over to år, med grundige vurderingar av trasear, god kontakt med grunneigarar og omsyn til naturmangfald og krav frå Rogaland fylkeskommune.
Prosjektet har vore ute på anbod. Vassbakk & Stol vann anbodet, og kontrakten vart signert i førre veke.
Arbeidet er no i gang, med etablering av riggplass og brakker. Hovudoppstart for anleggsarbeidet er planlagt etter sommarferien.
– Det blir nok både travelt og spennande. Det er eit positivt samarbeidsprosjekt med fleire aktørar, seier prosjektleiar for Vindafjord kommune, Willy Skulerud.
Kontrakten var signert av Berit Fyljesvoll Haugsland, som er einingsleiar for kommunaltekniske tenester og Åsmund Vea, som er prosjektsjef i Vassbakk og Stol.
Beate Tandrevold
Lite merkbart for publikum
Sjølv om prosjektet er stort, vil dei fleste innbyggjarar merke lite til arbeidet. Det blir lagt vekt på å gjennomføre utbygginga med minst mogleg ulempe for folk og trafikk.
– Me har stort fokus på HMS og tryggleik for tredjepartar som skuleelevar og grunneigarar. Logistikken er godt ivaretatt, slik at prosjektet kan gjennomførast så saumlaust som mogleg – med flinke folk på laget, fortel prosjektleiar for Vassbakk og Stol, Alf Inge Dagsland.
Beate Tandrevold
– Det største prosjektet innan vatn og avløp
Kommunalsjef for samfunnsutvikling, Halfdan Krohn Brekke, understrekar kor viktig prosjektet er:
– Det er gjort eit godt og grundig forarbeid, og vi har ein særdeles dyktig og grundig prosjektleiar. Dette er det største prosjektet innan vatn og avløp som vi har gjennomført i kommunen. Me er avhengige av dyktige folk som kan halde i prosjektet – og det har me her.
Han legg til:
– Det har vore eit godt samarbeid mellom økonomiavdelinga og kommunalteknisk eining i kommunen, og i tillegg med Haugaland Kraft Fiber og Fagne. Me er glade for å ha fått tilbod frå så mange flinke tilbydarar, og det er kjekt å jobbe med ein solid og seriøs aktør som Vassbakk & Stol.
– Kjekt å bygge noko som blir betre for framtida
Prosjektleiar i Vassbakk & Stol, Alf Inge Dagsland, seier at dei har hatt eit godt samarbeid med kommunen.
– Dette blir eit løft for Vindafjord – både med utbygging av fiber og ei tryggare vassforsyning, fortel Alf Inge.
Han tilføyer:
– Me har hatt veldig god dialog med og positiv innstilling frå både grunneigarar og dei ulike aktørane. Me kjem òg til å bruke lokalt næringsliv i Vindafjord som underleverandørar. Det er kjekt å få vere med å bygge noko som gjer kvardagen og framtida betre.