Stolpejakten 2026 i Vindafjord – bli med ut på tur!

Stolpejakten er ein gratis og lågterskel aktivitet som skal fremja folkehelsa, inspirera til utandørs aktivitet og samtidig gjera deg betre kjend med nærmiljø og kulturhistorie i kommunen.

Turane til stolpane er delte inn etter ulike nivå, slik at dette er ein aktivitet for alle – uansett alder og form. 

Mange av stolpane er plasserte slik at dei kan nåast med både rullestol og barnevogn. Her kan du få fine turar, oppdaga nye plassar og samstundes vera med i trekning av premiar. 

For dei som ønskjer det, er det også mogleg å konkurrera litt med vener og kjende.

Anita Skeie Vormestrand

Stolpejakt i fleire bygder

I 2026 satsar frivilligsentralar og turistforeiningar i Rogaland på stolpejakt i nesten alle kommunar – og Vindafjord er sjølvsagt med. 

Grendeutvala og turkontaktane i bygdene organiserer Stolpejakten i samarbeid med kommunen. Dette gjer at stolpane blir plasserte av lokale innbyggarar som kjenner områda godt, og som veit kor det finst gode turmoglegheiter og lokale perler.

På veg til Vådhytta Jonè Bašinskè

Me vil retta ein stor takk til alle grunneigarar som stiller seg positive til aktiviteten. Når du er på tur, ber me deg visa omsyn – tenk på parkering, hald bandtvang der det gjeld, ta omsyn til dyr på beite og lukk grindar du opnar.

Me oppmodar om å unngå køyring mellom stolpane.

Du kan skanna same stolpe fleire gonger, men for å få stolpepoeng må du ha skanna fem andre stolpar først. 

Dersom ein stolpe er øydelagt eller borte, kan du likevel registrera besøket i appen ved å trykkja på stolpen på kartet, velja «Vis info» og deretter «Registrer besøk på stolpe».

Me ønskjer deg ein god tur – og lukke til med Stolpejakten 2026!