Kurset har vore retta mot servicebransjen, og deltakarane som var samla kom frå ei rekkje ulike verksemder i både Ølen og Vikedal.
Blant deltakarane var tilsette frå bank, daglegvarebutikkar, apotek og andre serviceyrke – alle med ei viktig rolle i kvardagen til personar som lever med demens.
– Dette kurset har vore veldig bra, og me har fått gode tilbakemeldingar frå deltakarane, fortel Nina Alvseike og Hanne Øvernes, kurshaldarar og sjukepleiarar i hukommelsesteamet.
Bak frå venstre: Nina Alvseike (hukommelsesteamet), Magne Christiansen (SpareBank 1 SR‑Bank), ordførar Ole Johan Vierdal, Sigurd Gjerdevik (kommunalsjef helse) og Astrid Viland (Vindafjord demensforening). Framme frå venstre: Hanne Øvernes (hukommelsesteamet), Isabel Meling (SpareBank 1 SR‑Bank), Anne Mette Klungland (Vindafjord kommune), Viljia Kisle (butikksjef Coop), Emilie Prytz (Apotek 1 Ølen) og Berit Hetland (leiar i Vindafjord demensforening).
Kristine Thorsen Eikeland
Viktig arbeid for heile samfunnet
Ordførar Ole Johan Vierdal takka både deltakarane og arrangørane, og understreka kor viktig arbeidet med demensvennleg samfunn er for Vindafjord.
– Dette er svært viktig arbeid for Vindafjord. Eg vil takka både dei som har delteke på kurset og dei som har arrangert det.
Kurset er arrangert av hukommelsesteamet i Vindafjord kommune i samarbeid med Vindafjord demensforening, og er ein del av den nasjonale satsinga på demensvennlege samfunn.
Kristine Thorsen Eikeland
Nye kurs til hausten – vil nå heile kommunen
Planen er å setja opp nye kurs til hausten, og då også leggja dei til fleire bygder i kommunen.
– Det er viktig å koma dit folk er. Me ønskjer å nå heile Vindafjord, slik at flest mogleg kan få denne kunnskapen, seier arrangørane.
Når minst halvparten av dei tilsette i ei verksemd har gjennomført kurset, får arbeidsplassen kursbevis og eit klistremerke som kan setjast i vindauget.
Dei tilsette får òg pins som viser at dei har opplæring i demensvennleg tilrettelegging.
Hanne Øvernes frå Hukommelsesteamet og leiar i Vindafjord demensforening, Berit Hetland, takka for engasjementet og understreka kor viktig dette arbeidet her.
Kristine Thorsen Eikeland
Små grep som gir tryggleik
Kurshaldarane peikar på at det ofte er små og enkle tiltak som gjer den største forskjellen i kvardagen.
– Me ser at det ofte er små grep som skal til for at folk kjenner seg tryggare og meir inkluderte. Når fleire har kunnskap, blir det lettare å spørja om nokon treng hjelp, seier dei.
Tiltak som ro, tolmod, hjelp med betaling eller orientering, samt å redusera stress og kø, kan bety mykje både for personar med demens og for pårørande.
Positiv respons og sterkt engasjement
Leiar i Vindafjord demensforening, Berit Hetland, er svært glad for engasjementet ho har sett blant deltakarane.
– Det er inspirerande å sjå kor positive deltakarane er, og at så mange ønskjer å bidra. Å bli møtt med forståing i kvardagen betyr enormt mykje for både personar som lever med demens og pårørande, seier ho.
Målet er å rusta lokalsamfunnet slik at fleire kan bu heime lengst mogleg – noko dei fleste ønskjer sjølve. Over 100 000 menneske i Noreg lever i dag med demens, og talet er venta å auka.
Konkrete tips i kvardagen
Blant deltakarane var banksjef Magne Christiansen og fleire frå Sparebank 1 SR‑Bank Ølen. Dei opplevde kurset som svært nyttig:
– Me møter jamleg kundar som lever med demens i banken. Kurset har gitt oss gode, konkrete tips i kvardagen.
Ordførar Ole Johan Vierdal saman med banksjef i Sparebank 1 SR-bank, Magne Christiansen og Isabel Meling.
Kristine Thorsen Eikeland
Emilie Prytz Hammarqvist, apotekar, seier kurset var ei verdifull oppfrisking:
– Me møter fleire som lever med denne sjukdommen, og det er viktig å vera bevisst. Å ta vare på dei er eit felles prosjekt.
Kristine Thorsen Eikeland
For Viljia Kisle, butikksjef ved Coop, traff kurset rett i butikkkvardagen:
– Det var konkret og med gode videodøme frå situasjonar me faktisk møter. Det gjer det lettare å forstå behova til kundane og møta dei med meir tolmod og forståing.
Viljia Kisle, butikksjef i Coop, tar med seg mange gode tips frå kurset. Her saman med ordføraren.
Kristine Thorsen Eikeland
Eit felles samfunnsansvar
I Vindafjord lever meir enn 200 personar med demens. Rundt kvar av desse står ofte fleire pårørande i krevjande situasjonar.
– Ein reknar at kvar person som lever med demens har i snitt fire pårørande. Det betyr at det er mange som står i tøffe situasjonar, framheva Hetland.
Kommunalsjef for helse i Vindafjord, Sigurd Gjerdevik, peika på kor viktig det er at heile lokalsamfunnet står saman i arbeidet med eit demensvennleg samfunn.
Det er eit felles ansvar for heile lokalsamfunnet – der alle spelar ei viktig rolle.
Kursa blir ein kontinuerleg del av arbeidet framover, og målet er eit tryggare og meir inkluderande Vindafjord – for alle.
Anne Mette Klungland frå Vindafjord kommune mottok kursbevis frå ordførar Ole Johan Vierdal
Kristine Thorsen Eikeland