Leiarar frå barnehage, skule, helse, NAV og andre einingar i Vindafjord kommune var samla til leiarsamling tysdag 7. mai.
Målet med samlinga var å styrke fellesskapet, byggje kompetanse og tryggleik i arbeidet med barn og familiar som har opplevd livsbelastningar og traume.
Samlinga markerte startskotet for innføringa av kompetansepakken «Trygge vaksne med traumekompetanse», utvikla av RVTS Vest.
Gjennom dagen fekk leiarane fordjupe seg i tema som emosjonell støtte, reguleringsarbeid og korleis dei som leiarar kan bidra til eit utviklande og støttande arbeidsmiljø.
– Det handlar om å forstå kva barna treng – men òg kva dei tilsette treng, forklarte dei engasjerte kurshaldarane.
Beate Gauden og Julie F. Andreassen er kurshaldarane som står bak kompetansepakken «Trygge vaksne med traumekompetanse», i regi av RVTS Vest.
Kristine Thorsen Eikeland
Ein inspirerande dag
Med inspirasjon, refleksjon, dialog, praktiske øvingar og god stemning på tvers av einingar og fagområde, vart dagen eit viktig steg vidare i Vindafjord si felles satsing på tryggleik og kompetanse i møte med barn og familiar.
– Når vi klarer å vere trygge vaksne, skapar vi òg tryggleik for kollegaer og barn. Det er her endringa startar, og difor er det ein god strategi å byrja med leiarane, forklarte kurshaldar Julie F. Andreassen.
Ho er spesialpedagog med brei erfaring frå barnevern, barnehage og skule. Saman med kollega Beate Gauden – tidlegare barnehage- og skulesjef – leia ho dagen med engasjerande formidling, refleksjon og praktiske øvingar.
– Målet er å møte barna med forståing, og vere regulerte og tilgjengelege vaksne. Trygge vaksne skaper ikkje berre ein betre kvardag for barna, men også for kollegaene sine. Det handlar både om barnesyn og arbeidsmiljø. Det er nyttig å få eit felles språk og ei felles forståing, understreka Gauden.
Kompetansepakken dei held kurs i, har dei utvikla saman. Sandnes kommune har vore pilotkommune, og tilbakemeldingane derifrå har vore svært positive.
Beate Gauden jobbar i RVTS og held kurset «Trygge vaksne med traumekompetanse».
Kristine Thorsen Eikeland
Heile Laget Rundt Barn og Unge
Leiarsamlinga byggjer vidare på fagdagen «Heile laget rundt barnet» tidlegare i år.
– Tilbakemeldingane frå deltakarane var så positive at vi ønskte å følgje opp og gi dei meir av dette. Mange opplevde det som svært inspirerande og nyttig, fortel Sonja Hundseid Lærdal, leiar for PPT og medlem i arbeidsgruppa Heile Laget Rundt Barn og Unge (LRBU).
Vindafjord kommune ønskjer no å forankre traumekompetanse i alle ledd. Leiarane spelar ei nøkkelrolle i dette arbeidet. Kompetansepakken vil bli rulla ut i einingane utover våren og hausten, og fleire leiarar skal også gjennomføre det digitale opplæringsprogrammet Traumeskulen.
Ane Kesia Eide Fatland (kultursjef/leiar for kultur og læring), Anita Jørstad Grindheim (Barnehage- og skulesjef) og Sonja Hundseid Lærdal (Leiar PPT) er ein del av arbeidsgruppa Heile Laget Rundt Barn og Unge (LRBU), som har jobba med prosjektet i Vindafjord kommune.
Kristine Thorsen Eikeland
Kvifor er dette viktig for Vindafjord kommune?
Arbeidsgruppa bak satsinga er tydeleg på kvifor dette arbeidet er viktig:
– Vi møter dei same barna og ungdommane på ulike arenaer i kommunen – anten det er på skulen eller på fritida. Når vi som leiarar går føre og viser veg, kan vi sikre at alle vaksne rundt barnet har same forståing og tilnærming. Dette er ein viktig del av eit felles kompetanseløft, seier Anne Kesia Eide Fatland, kultursjef for kultur og læring.
– Vindafjord kommune har fokus på å byggje kompetanse på tvers. Med felles språk og haldningar kan vi møte barn og familiar med varme og tryggleik, supplerer barnehage- og skulesjef Anita Jørstad Grindheim.
Kristine Thorsen Eikeland
KORT FORTALT:
- Vindafjord kommune samla leiarar frå alle einingar til fagdag, som oppfølging av «Heile Laget Rundt Barn og Unge» 20. januar.
- Leiarsamlinga markerer starten på implementeringa av RVTS Vest si nye kompetansepakke «Trygge vaksne med traumekompetanse i barnehage og skule».