Søndag 18. oktober går årets TV-aksjon av stabelen, og i Vindafjord er me klare til å bidra!
I år går innsamlinga til NRC Flyktninghjelpen, ein av dei største humanitære organisasjonane i Noreg. Dei arbeider i dei mest alvorlege krisene i verda. Målet i år er å hjelpe over 400 000 menneske på flukt med ein trygg heim og håp for framtida.
Ein heim er meir enn fire veggar og eit tak. Når familiar får ein stad å bu, blir det lettare å skaffa arbeid, senda barna på skulen og skapa ein meir stabil kvardag. Ein heim gir livsviktig beskyttelse, tryggleik og tilhøyrsle.
Over 120 millionar menneske er i dag på flukt frå krig, konflikt og forfølging – det er dobbelt så mange som for ti år sidan. Mange har mista både heimen, nærmiljøet og trua på framtida.
Pengane frå TV-aksjonen 2026 skal bidra til tryggare og betre buforhold for menneske på flukt i Syria, Gaza, Afghanistan, Tsjad, Sudan og DR Kongo.
Men for at dette skal bli ein suksess, treng me deg!
Vil du bli bøsseberar?
Å vera bøsseberar er ein enkel og viktig måte å bidra på – og ei fin anledning til å gjera noko meiningsfullt saman med familie, vener eller naboar. Du kan melda deg som bøsseberar på tvaksjonen.no, og vera med på å gjera ein forskjell for menneske som treng det aller mest.
I over 50 år har TV-aksjonen løfta fram ei rekkje viktige saker – frå helse og utdanning til miljø, menneskerettar og humanitær hjelp. I år er det menneske på flukt som står i sentrum, gjennom arbeidet til NRC Flyktninghjelpa.
Dato: Søndag 18. oktober
Korleis melda seg: Gå inn på tvaksjonen.no
Andre måtar å gi:
- Vipps: 2133
- SMS: Send TVA til 2133
- Bank: 8380 08 09000
Saman gjer me verda litt betre – ei bøsse om gongen 💚
Midlane går mellom anna til:
- telt og andre nødbustader
- mellombelse og permanente heimar
- vass- og sanitærprosjekt
- juridisk hjelp for å sikra bustad- og eigedomsrettar
Vindafjord kommune oppmodar innbyggjarar, lag, organisasjonar, skular og arbeidsplassar til å engasjera seg. Saman kan me gje fleire menneske på flukt det dei treng aller mest: ein trygg heim og håp om ei betre framtid.
Vindafjord Kommune