Givarglede frå næringslivet
Så langt er det registrert 276 500 kroner frå bedrifter i Vindafjord kommune.
På ringedugnaden deltok folkevalde, representantar frå Medvind24 og tilsette på avdeling Kommunikasjon og service i Vindafjord kommune. Mona Kristin Haraldseid er hovudkoordinator for innsamlinga.
Difor betyr årets TV-aksjon mykje
I år går innsamlinga til NRC Flyktninghjelpen. Organisasjonen arbeider i nokre av dei mest alvorlege krisene i verda, og målet med årets aksjon er å gi over 400 000 menneske på flukt ein trygg heim og håp for framtida.
Ein heim er meir enn fire veggar og eit tak. Når familiar får ein stad å bu, blir det lettare å skaffa arbeid, senda barna på skulen og skapa ein meir stabil kvardag. Ein heim gir beskyttelse, tryggleik og tilhøyrsle.
Over 120 millionar menneske er i dag på flukt frå krig, konflikt og forfølging – meir enn dobbelt så mange som for ti år sidan. Mange har mista både heimen, nærmiljøet og trua på framtida. Pengane frå TV-aksjonen 2026 skal bidra til tryggare og betre buforhold for menneske på flukt i Syria, Gaza, Afghanistan, Tsjad, Sudan og DR Kongo.
Takk til næringslivet – og oppmoding til innbyggjarane
Komiteen rettar ei stor takk til næringslivet i Vindafjord kommune for positiv respons og stor givarglede til både TV-aksjonen og Barnekreftforeninga.
Vindafjord kommune er ansvarleg for å organisera og gjennomføra årets TV-aksjon lokalt. Me oppmodar alle innbyggjarar til å ta godt imot bøsseberarane søndag 18. oktober – kvar krone gir håp og hjelp til menneske på flukt.
Les meir om NRK TV-aksjonen 2026
