Det nærmar seg skulestart, og SFO opnar i starten av august.
Trygg Trafikk oppmodar foreldre til å øva og kartlegga skulevegen før skulestart 2025.
— Det er lettare å hugsa ting me har sett med eigne auge. Lærer me barna å forstå trafikken, tek dei betre val, seier regionleiar i Trygg Trafikk Rogaland, Elisabeth W. Haaland.
Trygg Trafikk
Å ferdast som trygg trafikant er noko som må lærast. Me oppmodar derfor til å øva på skulevegen saman med barna. Finn den tryggaste ruta til skulen, gå ho saman, og snakk om trafikken.
Lag enkle hugsereglar, til dømes om kvar ein skal stoppa opp, sjå og lytta før kryssing av veg. Bruk gjerne Google Maps og sjå kva vegar ein kan gå saman med barna.
Colourbox
Snakk om det
I tillegg til skulestart i midten av august, er det mange barn som er på skulen via SFO alt frå 1. august, så me treng å øva på skulevegen alt no.
Barn har eit avgrensa synsfelt, er impulsive og blir lett distraherte. Sidan dei òg manglar trafikkforståing, er det lurt å gå saman med dei og læra dei å bli tryggare i trafikken.
Øving gjer meister, anten ein går, syklar, tek buss eller køyrer bil.
— Snakk om kva som kan vera trygt og farleg å gjera i ulike situasjonar på veg til skulen, for å trena opp risikoforståinga og vurderingsevna. Tid saman med litt frisk luft og rørsle før skuledagen startar, er gull verdt, seier regionleiar Elisabeth W. Haaland.
Pixabay
Bruk gjerne nettsida til Trygg Trafikk når ein øver på skulevegen.
På nettsida barnastrafikklubb.no finst fleire gode praktiske tips og aktivitetar som kan brukast for å bli betre trafikkantar.
Trygg Trafikk sender òg ut skulestartshefte til alle 1. klassingar i ranselpost.
TIPS TIL Å ØVE PÅ SKULEVEGEN:
- Gå skulevegen utan barnet først og kartlegg stader som kan vere kompliserte eller innehalde mogelege farar. Gjerne først i kart, for å bli merksam.
- Ta dykk god tid og gå fleire turar saman.
- Prat om det som skjer langs vegen og dei farane som kan oppstå.
- La barnet ta meir og meir styring etter kvart.
- Ha det hyggeleg saman.