Nav Vindafjord-Etne flyttar inn i nytt bygg: – Det er flotte og funksjonelle lokale

Praktisk informasjon og opningstider på ulike språk finn du nedst i artikkelen.

Practical information and opening hours in different languages can be found at the bottom of the article.

Det er travle og spanande dagar for leiar Kristin Tofte og dei tilsette i Nav Vindafjord-Etne. 

I ei tid har det vore stor flytteaktivitet mellom dei tidlegare lokala på rådhuset og dei nye lokala nede ved kaien i Ølen. No er mykje på plass, og forventningane er store før dørene opnar.

Leiar Kristin Tofte er nøgd med dei nye lokala. Kristine Thorsen Eikeland

I om lag eitt og eit halvt år har arbeidet med dei nye lokala vore i gang. Dei tilsette har vore tett involverte i både planlegging og utforming, og har mellom anna delteke i val av løysingar, funksjonar og fargar.

– Me har ønskja at lokala skal opplevast varme, energiske og trivelege, og har gått for fargar som passar godt saman og gir liv, fortel Tofte.

Grønt er fargen som går mest att i lokala, og spelar fint saman med den lyse atmosfæren og den flotte sjøutsikta gjennom dei store vindauga. 

På dørene heng skilt med romnamn henta frå nutar og fjelltoppar i Etne og Vindafjord, noko som gir lokala ein tydeleg lokal identitet.

Kristine Thorsen Eikeland

10 år på rådhuset

Nav Vindafjord-Etne har halde til på Vindafjord rådhus i ti år. No går dei inn i ein ny fase, med nye lokale og nye moglegheiter.

– Me kjem til å sakne kollegaene våre på rådhuset, som me har hatt eit veldig godt samarbeid med. Samstundes gler me oss til ein ny epoke i flotte og funksjonelle lokale, seier Tofte.

Dei tilsette gler seg til å flytte inn. Kristine Thorsen Eikeland

Mange moglegheiter

Dei nye lokala er planlagde med tanke på både funksjonalitet og behov.

 I første etasje er det lagt til rette for møte med innbyggjarar og ulike tenester, med fleire samtalerom, gode løysingar for rettleiing og møte, og etterlengta kurslokale for kurs og verkstader. 

Her blir det mellom anna mogleg å arrangere CV-verkstad og andre aktivitetar, og lokala har eige kjøkken som kan nyttast i samband med kurs.

I andre etasje får dei tilsette moderne og fleksible arbeidsområde, med fokusrom, opne soner, store møterom og sosial sone med kjøkken.

Kristine Thorsen Eikeland

Dyktige bidragsytarar

For Kristin er det ekstra kjekt å sjå dei nye lokala stå ferdige. Mange gode krefter har vore med undervegs, og resultatet har blitt både praktisk, innbydande og gjennomført.

– Dette er noko me har sett fram til, og det er veldig kjekt å sjå kor fint det har blitt. Mange flinke folk har bidrege undervegs, og no kjenner me på både stoltheit og glede over å kunne flytte inn, seier ho.

Praktisk informasjon

Kristine Thorsen Eikeland

Practical information and opening hours in different languages 

NAV

NAV