Styret vil no starta prosessen med å rekruttera ny direktør. Målet er å sikra ein god og planlagd overgang, der Ramstad òg vil kunna bidra med prosjektoppgåver og avslutting av pågåande arbeid i tida etter direktørskiftet.
Byvandring med museumsdirektør Mads Ramstad.
Foto: Haugalandmuseet
Direktør i 23 år
Ramstad vart tilsett som konservator i Haugalandmuseet i 1999 og tok til som direktør i 2004. Han har hatt ei sentral rolle i utviklinga av Haugalandmuseet gjennom nærare tre tiår.
– Mads Ramstad har hatt ei avgjerande rolle i utviklinga av Haugalandmuseet gjennom nærare tre tiår. Som direktør i 23 år er han ein av dei lengstsitjande museumsdirektørane i Noreg etter år 2000, seier styreleiar John Malvin Økland.
Haugalandmuseet omfattar mellom anna Vindafjordmuseet, Karmsund folkemuseum, Haugesund billedgalleri, Dokken museum, Arquebus krigshistorisk museum, Nedstrand bygdemuseum, Bokn bygdemuseum, Hiltahuset på Røvær, sjøhuset til Mikal L. Klovning på Utsira og Tonjer fyrstasjon.
Eigd av fem kommunar
Haugalandmuseet er eigd av kommunane Haugesund, Utsira, Tysvær, Bokn og Vindafjord. Museet er eitt av Noreg sine om lag 60 konsoliderte museum med ansvar for formidling, forvalting og forsking knytt til kulturarven.
I Ramstad si tid har Haugalandmuseet vorte utvikla til eit konsolidert regionmuseum for kunst- og kulturhistorie på Haugalandet. Under leiinga hans har museet gjennomført konsolideringa av dei lokale musea på Haugalandet, styrkt det faglege arbeidet med samlingar og kulturarv, og vidareutvikla museet som ein viktig regional kulturinstitusjon.
Vil bidra i overgangen
– Det har vore eit privilegium å få vera med på utviklinga av Haugalandmuseet gjennom så mange år. Saman med dyktige medarbeidarar, eigarar og samarbeidspartnarar har me bygd ein sterk regional institusjon. Eg ser fram til å bidra til ein god overgang når den tid kjem, seier Mads Ramstad.