LRBU-leiardagen samla tilsette frå fleire kommunale tenester til ein fagdag med fokus på språk, integrering og samarbeid med familiar med innvandrarbakgrunn.
LRBU står for og handlar om heile laget rundt barn og unge.
Komiteen bak arrangementet – Ane Kesia Fatland, Sonja Hundseid Lærdal, Anita Jørstad Grindheim og Kristine Haraldseid Strand – opna dagen før Integreringstenesta tok over med fagleg innhald.
Ane Kesia, Sonja, Anita og Kristine var ein del av planleggingskomiteen.
Nils Erik Eide
– Det er utruleg bra at kommunen satsar på tematikken på ein så brei og fleirfagleg arena. Vindafjord har busett mange flyktningar og er ein fleirkulturell kommune. Det er bra med fokus på korleis ein skal møta folk, seier Miriam Aareskjold, leiar for Etne Vindafjord intergreringsteneste.
Det vart ein dag som synte kor viktig språkforståing, kulturkompetanse og samarbeid er for å gi trygg og inkluderande oppfølging til alle barn og familiar.
Nils Erik Eide
Mange gode tankar og innspel
Gjennom dagen vart det jobba med caseoppgåver som skapte engasjement og gode diskusjonar.
– Det er utruleg bra å sjå kor mange gode tankar og innspel som kom fram, fortel Miriam og legg til:
– Tilbakemeldingane etterpå var tydelege: Dagen var både nyttig og positiv.
Programmet baud på fleire spennande innlegg:
Miriam Aareskjold starta med temaet mottak og samarbeid med familiar med innvandrarbakgrunn.
Tom Tønnesen følgde opp med familiekontaktrolla og korleis tverrfagleg samarbeid fungerer i praksis, før Aareskjold løfta fram kor viktig det er å bruke kvalifisert tolk.
Språk og kommunikasjon stod i sentrum gjennom heile dagen. Inna Luchenko snakka om Ukraina og ukrainsk kultur.
Inna Luchenko frå Integreringstenesta
Nils Erik Eide
Har busett mange
Busetjing og mangfald var eit anna hovudtema.
Vindafjord har busett mange dei siste åra – 91 i 2023, 104 i 2024 og 30 så langt i 2025. For 2026 er det oppmoda om 33, men dette er enno ikkje politisk behandla. Det er bra at frivillig innsats og foreldreinvolvering blir framheva som viktige tiltak for god integrering.
Psykolog Zemir Popovac belyste postmigrasjonsvanskar – utfordringar som isolasjon og tap av identitet, som påverkar både psykisk helse og barn sin kvardag.
Familiekontaktane har ei nøkkelrolle i oppfølginga av familiar. Dei følgjer opp i opptil fem år og hjelper med skule, fritid og integrering.
Tolketenesta fekk også stor merksemd. Her vart det understreka at barn aldri skal brukast som tolk, og at god førebuing og dokumentasjon er viktig.