Kan du tenka deg å bli frivillig?

Vindafjord kommune skal i 2023 busetta 60 flyktningar, medan det i fjor vart busett 55 personar. Flyktningane kjem frå forskjellige land og varierer i alder frå 0 til 75 år.

Ein viktig del av integreringsarbeidet er å legga til rette for at flyktningane kjem i kontakt med andre innbyggarar i kommunen. Mange flyktningar ønsker å bli kjend med andre, ha nokon å prata norsk med, eller treng hjelp til andre praktiske oppgåver i kvardagen.

Integreringstenesta og frivilligsentralen ønsker å kopla saman flyktningar med enkeltpersonar eller familiar som vil bidra. Det er og behov for hjelp til å utføra enkeltståande oppgåver. Dersom du ønsker å bidra vil me prøva å matcha dine ønsker med behova til den enkelte flyktning. Du kan lesa meir, og melda deg som frivillig på frivillig.no (nettlenke).

Eksempel på måtar du kan bidra:

• Besøk-/språkven
• Turkamerat
• Reservebesteforeldre
• Sjåføroppdrag
• Følgjeperson til fritidsaktivitet eller arrangement
• Velkomstkomité (for eksempel invitere på ein middag eller ei omvisning i bygda)
• Innsamlingsansvarleg for brukte klede og utstyr
• Arrangør av sosiale møtepunkt
• Delta på spåktreff

Ta kontakt med frivilligsentralen eller integreringstenesta dersom du ynskjer å bidra eller har spørsmål.