Influensavaksinering på Kulturhuset i Ølen 2026

Smittevernlege Iris D Klage-Håheim Marianne L Rødde

Vaksineringa blir gjennomført over fem dagar i november. Leveransar frå legemiddelindustrien er noko forseinka i år, men smittevernlege Iris D. Klage-Håheim understrekar at innbyggjarane ikkje treng å uroa seg.

– Det kan tvert imot vere ein fordel at vaksineringa skjer nærare influensasesongen. Influensavaksinen gir vanlegvis best vern dei første tre månadene, og influensaen sirkulerer oftast mest frå desember og utover, seier ho.

-Folkehelseinstituttet tilrår influensavaksine innan byrjinga av desember. Innbyggjarane har derfor god tid til å bestille time og nytte kommunen sitt tilbod på Kulturhuset. Det er ikkje nødvendig å skunde seg til apoteket, der vaksinen kostar meir, seier smittevernlegen.

Bestill time gjennom helseboka

Fluad-vaksinen, som blir nytta til bebuarar på sjukeheim og i omsorgsbustader og personar med omfattande behov for heimetenester, kjem som vanleg i veke 40–41. Denne vaksinen har lengre verknadstid og kan setjast tidlegare.

Les meir om forseinkinga på fhi.no

Eit godt samarbeid

Som tidlegare år blir vaksineringa gjennomført som gruppevaksinering. Ordninga er godt innarbeidd og sørgjer for ei trygg og effektiv vaksinering.

Samtidig er vaksineringa ei viktig årleg beredskapsøving for kommunen. Helsepersonell samarbeider på tvers, øver på arbeidsflyt og får verdifull erfaring med å vaksinere mange på kort tid.

– Det er kjekt å sjå korleis alle dreg lasset i lag. Me er avhengige av godt samarbeid, og dei frivillige er ein svært viktig del av gjennomføringa. Dei bidreg til at folk blir tekne godt imot og at vaksinedagane går smidig, seier smittevernlege Iris D Klage-Håheim. 

Vaksinasjonsprogram for vaksne

Influensavaksineringa er ein del av vaksinasjonsprogrammet for vaksne, som blei innført 01.06.2025. I sesongen 2026/2027 omfattar programmet:

• årleg influensavaksine til personar som har fylt eller fyller 65 år i løpet av året, og yngre personar i risikogrupper
• oppfriskingsdose mot korona til personar frå 75 år og barn og vaksne i risikogrupper. Personar mellom 65 og 74 år kan også få vaksinen gjennom programmet dersom dei ønskjer det
• pneumokokkvaksine til personar fødde i 1960 eller seinare, frå og med kalenderåret dei fyller 65 år

Les meir om vaksinasjonsprogrammet for vaksne og FHI sine tilrådingar.

Frå Venstre: Lene Desiree Ulveraker Skartland, Iris D Klage-Håheim og Anne-Beate Økland Marianne L Rødde