Handlebussen – ein liten fredagstradisjon som gjer ein stor forskjell

Marianne Log Rødde

Ein av dei tilsette mopp­ar inngangspartiet og gjer klart for formiddagskundane. I ein krok står lefser, mandarinar og kaffi – gjort klar spesielt til gjestene frå Handlebussen.

Den grøne bussen og den faste rytmen

Rett før klokka slår halv, kjem den grøne Kolumbus-bussen rullande roleg inn på parkeringsplassen. Sjåfør Håkon Hemnes styrer bussen heilt inn til døra, kliv ut og gir stødig hand til dei som treng det.

I dag er det tvillingane Berit Frøland og Thea Alvseike som skal handle. Dei ler litt og seier at dei vanlegvis er fleire, men at sjukdom har redusert fredagsfølget denne gongen. Likevel er dei i godt humør og ivrige etter å kome i gang.

Tvillingane bur i kvar sin ende av bygda – Thea på Århaugen og Berit i Tørsdalen – men fredagen samlar dei.

Ein sjåfør som kjenner folk – og ein buss som betyr mykje

Håkon Hemnes

Håkon har køyrd Handlebussen i mange år. Han kjenner ruta, terrenget og passasjerane – og dei kjenner han. Det er tydeleg i måten dei snakkar til kvarandre på, med ein tone som berre kjem etter mange felles turar.

– Det er eit viktig tiltak for sjølvstendet til dei eldre, seier han medan tvillingane kliv av bussen. Små grep, men stor forskjell, forklarar han, og går fram for å hjelpe dei med å få fram handlevognene.

Thea fortel at han ikkje berre køyrer - men alltid hjelp til. 
– Han ber matvarene heilt inn i gangen hos meg. Eg er ikkje så stø på beina lenger, så det betyr mykje, seier ho.

Berit nikkar. For ho er det ikkje berre logistikken som betyr noko.
– Kaffipausen og praten er veldig koseleg. Men høgdepunktet er å handle sjølv. Eg har familie som kan hjelpe, men det å ordne ting på eiga hand gir ein god følelse, seier ho.

Eit lite fellesskap – og ein viktig kvardagstur

Etter handelen geleider Håkon damene og handlevognene ut att. Dei får sette seg i bussen, medan han løftar varene om bord og sørgjer for at alt står støtt. Ei vekeshandel er gjort, og kursen blir sett heimover – ein og ein, til dei ulike stoppa langs ruta.

Fredag for fredag

Handlebussen går kvar fredag i Vindafjord. For dei som nyttar tilbodet, er det meir enn ein transportteneste – det er rytme, fellesskap og ei kjensle av å kunne styre kvardagen litt meir sjølv.

Og inne i butikken, med moppen sett til side og kaffien varm, er det alltid nokon som smiler når dei ser bussen rulle inn.