Frå butikk til omsorg – Svein fann ny retning i livet

– Eg trudde først at helse ikkje var noko for meg. Men då eg høyrde om “Menn i helse”, vart eg nysgjerrig. Det verka spennande, fortel Svein.

Kristine Thorsen Eikeland

Starta som lærling ved Sandeid bufelleskap 

I april 2024 tok han steget og starta som lærling i helsefagarbeidarfaget ved Sandeid bufelleskap.  

No jobbar han både i bufelleskapet og på Sandeidtunet – og trivst svært godt.

– Det er ein givande jobb. Du får jobba med folk, og det betyr mykje. Bufelleskapet er heimen til brukarane, og det kjennest fint å bidra til at dei har det godt, seier han.

Svein byrja med å observera, men har gradvis lært meir og meir. No nærmar han seg fagbrevet, som han skal ta våren 2026.  

Frå før har han fagbrev i salgsfaget, så overgangen har vore stor.

– Eg var spent på korleis det ville bli med skule og praksis, men opplegget er bra. To veker på skule og to veker i jobb gjer at du får brukt det du lærer med ein gong. Det er kjekt, og vi har gode diskusjonar, fortel han.

Kristine Thorsen Eikeland

– Kva har eg gjort?

Svein hugsar godt korleis det var å starte: 
– Eg visste ikkje kva eg gjekk til. Tenkte første dagen: «Kva har eg gjort? Er dette noko for meg?» Men det gjekk fint. Eg blei godt kjend med brukarane og fann meg til rette.

Ein typisk dag på bufelleskapet består av kaffi og prat, stell og frukost, påkledning, følgje og hente på jobb, vaske leilegheiter, dra på bingo, fritidsaktivitetar, hjelpe til med handling, kafe og turar.

– Det er mykje variasjon, og vi har det kjekt. Godt samarbeid, kjekke kollegaer, god tone, latter og humor. Eg starta heilt frå bunnen, men har fått god rettleiing heile vegen, seier Svein.

Oppmoding til andre menn 

Svein meiner det er viktig å få fleire menn inn i helseyrket.

– Det set brukarane pris på. Og eg vil oppfordre andre: Prøv noko nytt! Helse kan vere noko for deg, sjølv om du ikkje trur det, seier han med eit smil.

Kristine Thorsen Eikeland

Det beste med jobben

– Det er utruleg givande å hjelpe nokon til å få det betre. Å snu ein dårleg dag til ein god – det gir mykje tilbake, fortel Svein.

Familie og vener har kommentert at det var spenstig å hoppe inn i eit heilt nytt yrke. Svein angrar ikkje eit sekund. Etter fagbrevet ønskjer han å halde fram som miljøarbeidar ved bufelleskapet.

– Eg har funne min plass, avsluttar han.