Fastlegesituasjonen i Vikedal og vegen vidare

Vindafjord kommune har ikkje lukkast med å rekruttera nye fastlegar til Vikedal legekontor innan fristen. Ein startar no ein prosess for å overføra legeheimlane til Ølen legekontor, i tråd med kommunestyret sitt vedtak.

Vindafjord kommune har over lengre tid arbeidd for å rekruttera nye fastlegar til Vikedal legekontor, utan å lukkast

Då kommunedirektøren i oktober 2025 la fram forslag om å overføra legeheimlane til andre legekontor, vedtok kommunestyret at dersom ein ikkje hadde rekruttert fastlegar til begge heimlane i Vikedal innan 1. februar 2026, skulle kommunedirektøren få fullmakt til å overføra heimlane til Ølen legekontor.

Vedtak i kommunestyret

«Kommunedirektøren held fram med stillingsutlysing og rekrutteringsarbeid ved legekontoret i Vikedal. Dersom ein ikkje har lukkast med å tilsetja legar i begge stillingsheimlane innan 1. februar 2026, har kommunedirektøren fullmakt til å overføra stillingsheimlane til Ølen legekontor.»

Startar prosess for overføring

Sidan kommunen ikkje har klart å rekruttera nye fastlegar til Vikedal legekontor innan fristen, har kommunedirektøren no starta ein prosess der det blir planlagt å overføra legeheimlane til Ølen legekontor, i tråd med kommunestyret sitt vedtak frå 21.10.2025.

Vidare framdrift og informasjon

HR‑avdelinga vil sikra at prosessar med tilsette og tillitsvalde blir gjennomførte på ein god og ryddig måte.

Det er enno for tidleg å seia noko om når ei endeleg overføring vil skje, men kommunen vil gjennom våren 2026 leggja vekt på godt informasjonsarbeid og nødvendige førebuingar.

Bilde av lege - Klikk for stort bilete Pexels
Sist endra 06.02.2026 09.40