Framlegget legg vekt på økonomisk berekraft, førebygging, digitalisering og langsiktig utvikling av tenestene i kommunen. Samstundes blir satsinga «Vindafjord 2.0» lansert som eit samla omstillings- og utviklingsarbeid for heile organisasjonen.
Halfdan Krohn-Brekke la fram sitt første budsjett som kommunedirektør i Vindafjord kommune 27.10.26.
Kristine Thorsen Eikeland
Vindafjord kommune står, som mange andre kommunar, framfor store endringar dei komande åra. Talet på eldre aukar, kampen om arbeidskrafta blir hardare, og kommunen står framfor store investeringar innan helse- og omsorg og teknisk infrastruktur.
– Dette budsjettet handlar om meir enn tal for neste år. Me må ta grep no for å sikra at Vindafjord kommune også i framtida kan levera gode tenester innanfor dei ressursane me har til rådvelde. Samstundes må me skape eit handlingsrom som gjer oss i stand til å utvikla lokalsamfunna våre vidare og leggja til rette for vekst og nye moglegheiter, seier kommunedirektør Halfdan Krohn-Brekke.
Framtidas utfordringar krev nye løysingar
Befolkningsutviklinga viser at talet på eldre vil auka betydeleg i åra som kjem, medan veksten i den yrkesaktive delen av befolkninga er avgrensa. Samstundes aukar forventningane til kommunen sine tenester.
– Den største utfordringa framover er ikkje nødvendigvis mangel på pengar, men mangel på arbeidskraft. Skal me lukkast, må me både rekruttera fleire, ta i bruk teknologi og organisera oss annleis enn i dag, seier Krohn-Brekke.
For å møta utfordringane legg budsjettframlegget vekt på førebygging, digitale løysingar, kompetanseutvikling og tiltak som gir betre bruk av kommunen sine samla ressursar.
Vindafjord 2.0
Eit sentralt grep i økonomiplanperioden er satsinga Vindafjord 2.0.
Arbeidet skal samle tilsette, leiarar og folkevalde om ei felles forståing av utfordringane kommunen står overfor og korleis organisasjonen skal utviklast for å møte framtida.
– Vindafjord 2.0 handlar ikkje om at nokre få delar av organisasjonen skal endre seg. Det handlar om at me som organisasjon må skape ei felles forståing av utfordringane me står overfor og korleis me skal møte dei saman. Skal me bygge framtidas kommune, må me også sikre at Vindafjord er ein attraktiv arbeidsplass og ein attraktiv kommune å bu og leve i, seier kommunedirektøren.
Som del av satsinga skal kommunen gjennomføra ein brei prosess for å utvikla ei felles framtidsretning for organisasjonen, inkludert arbeid med visjon, verdigrunnlag, leiarutvikling og kontinuerleg forbetring.
Målet er å styrkja kommunen si evne til omstilling og utvikling, og å sikra at heile organisasjonen trekkjer i same retning.
Satsar på førebygging og utvikling
Budsjettframlegget inneheld fleire målretta satsingar for å møta framtidige behov.
Mellom tiltaka er styrkt arbeidsretta oppfølging gjennom Nav, ny ergoterapeutstilling og vidare satsing på tidleg innsats i oppvekst. Samstundes blir det investert i digitale løysingar og teknologi som kan effektivisera arbeidsprosessar og styrkja kvaliteten i tenestene.
Kommunen vidarefører òg arbeidet med å rekruttera og halda på kompetente medarbeidarar i ein stadig meir krevjande arbeidsmarknad.
– Skal me lukkast framover, må me både førebyggja endå meir, arbeida endå smartare og utnytta ressursane endå betre enn i dag. Det handlar om å skapa handlingsrom til dei oppgåvene som kjem, men òg om å leggja grunnlag for vidare utvikling og vekst i kommunen, seier Krohn-Brekke.
Nils Erik Eide
Frivilligheita og næringslivet er viktige medspelarar
Kommunedirektøren peikar òg på at samarbeid med frivillige lag, organisasjonar og næringsliv vil bli stadig viktigare i åra som kjem.
– Sterke lokalsamfunn blir bygde i fellesskap. Noko av det som kjenneteiknar Vindafjord, er eit sterkt frivillig engasjement og eit næringsliv som bidreg aktivt til utvikling og fellesskap i lokalsamfunna våre. Eit tett samarbeid mellom kommunen, innbyggjarane, frivilligheita og næringslivet blir avgjerande for å møta framtidige utfordringar og halda fram med å utvikla heile Vindafjord, seier han.
Store investeringar for framtida
Den største satsinga er bygging av nytt omsorgssenter, som skal leggja grunnlaget for eit meir framtidsretta omsorgstilbod og meir effektiv drift innan helse og omsorg. I tillegg kjem store investeringar innan vatn og avløp, kommunale bygg og annan viktig infrastruktur.
– Det største investeringsprosjektet i økonomiplanen er nytt omsorgssenter. Dette er ei investering me må gjennomføra for å møta framtidas behov innan helse og omsorg på ein berekraftig måte, seier kommunedirektøren
Omstilling for å sikre handlingsrom
For å møta dei økonomiske utfordringane inneheld budsjettframlegget òg fleire omstillings- og effektiviseringstiltak.
Det blir arbeidd vidare med langsiktig omstilling i oppvekstsektoren, gjennomgang av tildelingspraksis, organisatoriske tilpassingar og tiltak for meir effektiv ressursbruk i fleire delar av organisasjonen.
– Omstilling handlar ikkje berre om å redusera kostnader. Målet er å frigjera ressursar slik at me kan prioritera områda der behova aukar mest. Samstundes må me sikra eit økonomisk handlingsrom som gjer oss i stand til å investera i utvikling, vekst og attraktive lokalsamfunn også i framtida, seier Krohn-Brekke.
No startar den politiske behandlinga
Etter at budsjettet er lagt fram, går saka vidare til politisk behandling i råd, utval, formannskap og kommunestyre før endeleg vedtak i desember.
Kommunedirektøren oppmodar innbyggjarane til å følgja prosessen og koma med innspel.
– Me har framleis handlingsrom, men det kjem ikkje av seg sjølv. Skal me lukkast framover, må me vera villige til å utvikla tenestene, prioritera annleis og arbeida smartare. Samstundes må me bruka handlingsrommet til å skapa vekst, styrkja lokalsamfunn og vera ein attraktiv kommune både for innbyggjarar, næringsliv og alle dei dyktige medarbeidarane våre. Budsjettframlegget er eit steg i den retninga, seier kommunedirektør Halfdan Krohn-Brekke
Les heile budsjettframlegget
Sjå kommunedirektøren presentera budsjettet på KommuneTV