Eikeskog kjem frå stillinga som eigedomssjef i Karmøy kommune, og er busett på Norheim i Karmøy.
Han har ei brei yrkesbakgrunn frå både offentleg og privat sektor, med mange års leiarerfaring frå mellom anna olje- og gassektoren.
Fleire sterke og gode kandidatar
Kommunaldirektør Halfdan Krohn-Brekke er svært nøgd med tilsetjinga.
Det var fleire sterke og gode kandidatar. Arvid Eikeskog har ein brei, solid og relevant bakgrunn som passar svært godt til denne rolla. Det er òg kjekt at me fekk så gode søkarar til Vindafjord, seier Krohn-Brekke.
Han peikar på at det er særleg positivt at Eikeskog kjem med erfaring frå både offentleg og privat verksemd.
Arvid Eikeskog er ny kommunalsjef for samfunnsutvikling i Vindafjord kommune.
Privat
Spennande moglegheit
Eikeskog fortel at interessa for stillinga vaks etter kvart som han fekk meir innsikt i arbeidet.
– Eg syntest stillinga verka svært spennande, og etter kvart som eg fekk høyra meir om oppgåvene, kjendest det nesten skreddarsydd for meg. Gjennom samtalane vart det berre endå meir interessant, seier han.
Han ser fram til å ta fatt på arbeidet i Vindafjord.
– Vindafjord er ein spennande kommune som eg ønskjer å vera med og utvikla vidare. Her er det eit rikt næringsliv og mykje aktivitet, og eg gler meg til å bidra.
Vil byggja gode relasjonar
Som kommunalsjef vil Eikeskog leggja vekt på å skapa gode relasjonar mellom kommunen og næringslivet.
– Eg ønskjer å vera ein god brubyggjar. Det handlar om å oppretta og halda ved lag ein god dialog med næringslivet, samstundes som me jobbar med kommuneplanarbeidet og legg retninga for utviklinga vidare.
Han trekkjer òg fram fagmiljøet i kommunen som ein viktig motivasjonsfaktor.
– Eg har høyrt mykje positivt om fagmiljøet og folka som jobbar her, og eg trur me kan læra mykje av kvarandre. Eg ser fram til å jobba saman med dyktige kollegaer.
Eit viktig verdival
For Eikeskog handlar overgangen til kommunal sektor òg om eit verdival.
– Å jobba i kommunen er kjempespennande og utruleg kjekt. Me leverer tenester til innbyggjarane gjennom heile livet – frå vogge til grav. Eg ønskjer å bidra og gje noko tilbake til samfunnet.
Han understrekar at han vil gjera sitt beste for å leva opp til forventningane i den nye rolla.
– Eg gler meg til å ta fatt og håpar eg kan vera med og leggja til rette for gode løysingar for både innbyggjarar og næringsliv i Vindafjord.
Eit aktivt familieliv
Eikeskog pendlar frå bustaden sin på Norheim. I tillegg eig han eit gardsbruk i Tysvær.
– Eg eig og er oppvaksen på eit gardsbruk på Eikeskog i Tysvær, og har difor alltid vore van med praktisk arbeid og gardsdrift. På fritida er eg mykje med familien – sambuar og barn i alderen 8 til 21 år – og vener. Eg likar å reisa på tur, følgja opp på fotball og sjå film med familien.
Før han tek til i ny jobb, skal familien på ferie.
– Me tek ein tur til Danmark før oppstarten, og det vert ein fin overgang før eg startar i ny og spennande jobb i Vindafjord, avsluttar Arvid.